ՀՀ կառավարության 2009 թվականի հուլիսի 23-ի նիստի թիվ 30 արձանագրության 41-րդ կետի 2-րդ ենթակետի իրագործման նպատակով Հայաստանի Հանրապետության կենտրոնական բանկի և ազգային վիճակագրական ծառայության միջև բանակցություների արդյունքում 2011 թվականից սկսած ՀՀ վճարային հաշվեկշռի, միջազգային ներդրումային դիրքի և արտաքին պարտքի (արտաքին հաշիվների) վիճակագրության կազմումը ստանձնում է Հայաստանի Հանրապետության կենտրոնական բանկը (նախկինում այս գործառույթը իրականացրել է Հայաստանի Հանրապետության ազգային վիճակագրական ծառայությունը): Արտաքին հաշիվների վիճակագրության տեղափոխումը Կենտրոնական բանկ միտված է դրա որակի բարձրացմանը: Նշենք, որ աշխարհի երկրների մեծ մասում արտաքին հաշիվների վիճակագրության կազմման գործառույթը իրականացվում է կենտրոնական բանկերի կողմից, քանի որ ԿԲ-երը սովորաբար արտաքին գործառնությունների վերաբերյալ ունեն ավելի լայն տվյալների բազաներ: Արտաքին հաշիվների վիճակագրության տեղափոխումն առավել սահուն իրականացնելու համար ԿԲ և ԱՎԾ մասնագետների միջև իրականացվել են աշխատանքներ և համատեղ քննարկումներ նախորդ երկու տարիների ընթացքում, կնքվել է փոխըմբռնման հուշագիր՝ գործառույթի տեղափոխման հետ կապված: Եվ չնայած արտաքին հաշիվների վիճակագրության պաշտոնական կազմողը ՀՀ ԿԲ-ն է, ԱՎԾ-ը հետայսու ևս հանդիսանալու է արտաքին հաշիվների վիճակագրության կազմող և կազմմանն օժանդակող հիմնական գործընկեր կառույց:
2011 թվականի հունիսի 30-ին կհրապարակվեն Կենտրոնական բանկի կողմից կազմված 2011 թվականի առաջին եռամսյակի արտաքին հաշիվները: Միևնույն ժամանակ 2010 թվականի արտաքին հաշիվները կազմվել և վերանայվել է ԱՎԾ կողմից: ԱՎԾ-ն իրականացնելու է նաև 2010 թվականի վճարային հաշվեկշռի, միջազգային ներդրումային դիրքի և արտաքին պարտքի տարեկան ժողովածուների հրապարակումը: Հետագա ժամանակաշրջանների համար տարեկան ժողովածուները կհրապարակվեն ԿԲ կողմից, սակայն դրանք կներառվեն նաև ԱՎԾ «ՀՀ սոցիալ տնտեսական վիճակը» զեկույցում, «Հայաստանի վիճակագրական տարեգիրք» ժողովածուի և այլ հրապարակումների մեջ: