ՓՈՂԵՐԻ ԼՎԱՑՄԱՆ ԵՎ ԱՀԱԲԵԿՉՈՒԹՅԱՆ ՖԻՆԱՆՍԱՎՈՐՄԱՆ ԴԵՄ ՊԱՅՔԱՐ
Միջազգային համագործակցություն
Ակնարկ
Հայաստանի Հանրապետությունը, ի դեմս Ֆինանսական դիտարկումների կենտրոնի (ՖԴԿ), մասնակցում է միջազգային այն կազմակերպությունների ու կառույցների աշխատանքներին, որոնք ներգրավված են ՓԼ/ԱՖ ոլորտում միջազգային ստանդարտների մշակման, երկրների կողմից դրանց ներդրման ու իրականացման գործում:
Հայաստանի Հանրապետությունը Եվրախորհրդի Փողերի լվացման և ահաբեկչության ֆինանսավորման դեմ պայքարի փորձագետների հանձնախմբի (ՄԱՆԻՎԱԼ) լիիրավ անդամ է, իսկ Փողերի լվացման և ահաբեկչության ֆինանսավորման դեմ պայքարի եվրասիական (ԵԱԽ) խմբում ունի դիտորդի կարգավիճակ: Սրանք Տնտեսական համագործակցության և զարգացման կազմակերպության (ՏՀԶԿ) հովանու ներքո Ֆինանսական միջոցառումների հատուկ հանձնախմբի (ՖԱԹՖ) տիպի տարածաշրջանային կառույցներ են, որոնք նպատակ ունեն անդամ երկրներում ապահովել ՖԱԹՖ-ի 40 հանձնարարականների և 9 հատուկ հանձնարարականների ներդրումն ու իրագործումը: ՖԴԿ-ն 2007թ-ից անդամակցում է նաև ֆինանսական հետախուզության մարմինների Էգմոնտ խմբին, ինչը հնարավորություն է տալիս համագործակցել աշխարհի շուրջ 120 երկրների ֆինանսական հետախուզության մարմինների հետ, այդ թվում՝ անվտանգ համակարգով փոխանակել տեղեկատվություն, ինչպես նաև մասնակցել խմբի կառավարմանը, լիագումար և աշխատանքային խմբերի նիստերին: Վերը նշված միջազգային կազմակերպությունների եւ կառույցների, ինչպես նաև ՓԼ/ԱՖ դեմ պայքարի ոլորտին առնչվող այլ մարմինների հետ համագործակցությունն ու աշխատանքների կոորդինացումը գործող օրենսդրությամբ դրված է ՖԴԿ-ի վրա: