Հայաստանի Հանրապետության կենտրոնական բանկը Ֆինանսական կայունության
վերաբերյալ վերլուծությունների արդյունքները ամփոփ ներկայացնում է ֆինանսական
կայունության հաշվետվությունում: Ֆինանսական կայունության հաշվետվությունը
հրապարկվում է 2007թ-ից սկսած տարեկան, իսկ 2010թ-ից նաև կիսամյակային
պարբերականությամբ:
Ֆինանսական կայունության հաշվետվության
հիմնական նպատակն է կարճաժամկետ հեռանկարում իրական և ֆինանսական
հատվածներում նախկին և սպասվող զարգացումների համատեքստում երկրի ֆինանսական
կայունությանը սպառնացող հավանական ռիսկերի նկարագրումը: Հաշվետվությունում
ներկայացվում է որոշակի ժամանակահատվածի համար ֆինանսական կայունության
վերաբերյալ կենտրոնական բանկի գնահատականը, առկա ռիսկերը և դրանց
կանխարգելման կամ չեզոքացմանն ուղղված միջոցառումները:
Պարբերականի հրապարակումը թույլ է տալիս
բարձրացնել ֆինանսական հաստատությունների, ձեռնարկությունների,
տնտեսվարողների ու բնակչության տեղեկացվածության մակարդակը և ապահովում է
Կենտրոնական բանկի գործունեության թափանցիկությունը: Հավանական ռիսկերի
աղբյուրների և ֆինանսական կայունության խոցելիության վերաբերյալ
տեղեկատվության տրամադրումն իր հերթին նպատակ ունի կողմնորոշելու
հասարակությանը` ստեղծված իրավիճակներում որոշումների կայացման առումով:
Հայաստանի Հանրապետության ֆինանսական
կայունության վրա ազդող ռիսկերը կարող են ծագել Հայաստանի ներքին
տնտեսությունում, երկրից դուրս` արտաքին տնտեսությունում և բուն ֆինանսական
համակարգում: Ելնելով վերոնշյալից` Հայաստանի Հանրապետության կենտրոնական
բանկի ֆինանսական կայունության հաշվետվությունում անդրադարձ է կատարվում
ռիսկերին՝ հետեւյալ հիմնական ուղղություններով.
- Համաշխարհային տնտեսության
զարգացումներից ածանցվող ռիսկեր
- ՀՀ մակրոմիջավայրի զարգացումներով պայմանավորված ռիսկեր
- ՀՀ ֆինանսական շուկայում տեղ գտած զարգացումներից ածանցվող ռիսկեր
- ՀՀ ֆինանսական հաստատություններից ածանցվող ռիսկեր
- ՀՀ ֆինանսական ենթակառուցվածքներից ածանցվող ռիսկեր
- Նշված ռիսկերի զսպման կամ չեզոքացման
համար անհրաժեշտ մակրոպրուդենցիալ քաղաքականության իրականացում:
|