ԱՐԺԵԹՂԹԵՐԻ ՇՈՒԿԱ
Ներդրումային ծառայություններ
Հայաստանի Հանրապետության արժեթղթերի շուկայում առկա են ծառայության տեսակներ, որոնք ՀՀ օրենսդրությամբ անվանվում են ներդրումային ծառայություններ և ենթակա են լիցենզավորման ՀՀ կենտրոնական բանկի կողմից:
«Արժեթղթերի շուկայի մասին» ՀՀ օրենքի համաձայն՝ ներդրումային ծառայություններ են համարվում..
- հաճախորդներից արժեթղթերով գործարքների կատարման հանձնարարականների ընդունումը և հաղորդումը,
- իր կամ հաճախորդի անունից և հաճախորդի հաշվին արժեթղթերով գործարքների կատարումը,
- արժեթղթերում ներդրումների հետ կապված խորհրդատվության տրամադրումը հաճախորդներին,
- իր հաշվին և իր անունից արժեթղթերով գործարքների կատարումը,
- արժեթղթերի փաթեթի կառավարումը,
- արժեթղթերի երաշխավորված կամ չերաշխավորված տեղաբաշխման իրականացումը:
Հայաստանի Հանրապետությունում ներդրումային ծառայություններ կարող են մատուցել.
- բանկերը,
- ներդրումային ընկերությունները
- ներդրումային ֆոնդի կառավարիչները
- օտարերկրյա ներդրումային ընկերության մասնաճյուղերը
- ներդրումային ֆոնդի օտարերկրյա կառավարչի մասնաճյուղերը:
Ներդրումային ծառայություն մատուցող անձը, բացի ներդրումային ծառայություններից, կարող է մատուցել նաև հետևյալ ոչ հիմնական ծառայությունները`- արժեթղթերի պահառություն,
- փոխառության տրամադրում հաճախորդներին` արժեթղթերով գործարքների իրականացման համար` պայմանով, որ փոխատուն հանդիսանում է նման գործարքի կողմ,
- արժեթղթերի թողարկման և տեղաբաշխման կազմակերպման հետ կապված ծառայությունների մատուցում,
- խորհրդատվության տրամադրում ընկերություններին կապիտալի կառուցվածքի, կորպորատիվ ռազմավարության հարցերի վերաբերյալ, ընկերությունների վերակազմակերպման հետ կապված խորհրդատվական և այլ ծառայությունների մատուցում,
- արտարժույթի դիլերային առք ու վաճառքի գործառնությունների իրականացում,
- արժեթղթերով գործարքների հետ կապված հետազոտությունների, ֆինանսական վերլուծությունների և այլ ընդհանուր ներդրումային առաջարկությունների կազմում և տարածում:
Ներդրումային ծառայությունների մատուցում չի համարվում «Ներդրումային ֆոնդերի մասին» ՀՀ օրենքով սահմանված ներդրումային ֆոնդերի կառավարման գործունեությունը: