Սույն թվականի հունվարի 23-ին ոչ ֆինանսական հաստատությունների, իսկ 24- 25-ին՝ ֆինանսական հաստատությունների համար անց են կացվել փողերի լվացման և ահաբեկչության ֆինանսավորման դեմ պայքարի, այդ թվում՝ թիրախային ֆինանսական պատժամիջոցների միջազգային չափանիշներին համապատասխանության թեմայով աշխատաժողովներ։
Աշխատաժողովների շրջանակներում Հայաստանի Հանրապետությունում գործող ոչ ֆինանսական և ֆինանսական հաստատությունների ավելի քան 140 ներկայացուցիչների հետ քննարկվել են փողերի լվացման և ահաբեկչության ֆինանսավորման դեմ պայքարի, այդ թվում՝ թիրախային ֆինանսական պատժամիջոցների միջազգային չափանիշներին համապատասխանության առանձնահատկությունները, ռիսկահենք մոտեցման կիրառությունը, ֆինանսական հետախուզության մարմնի հետ համագործակցության միջազգային լավագույն փորձը և մի շարք այլ հարցեր։
Աշխատաժողովներն իրականացվել են «Հայաստանում տնտեսական հանցագործությունների արդյունավետ կանխարգելման և դրանց դեմ պայքարի ազգային կարողությունների հզորացում» ծրագրի շրջանակում, որը ֆինանսավորվում է Եվրոպական միության և Եվրոպայի խորհրդի համատեղությամբ և իրականացվում Եվրոպայի խորհրդի՝ «Գործընկերություն հանուն լավ կառավարման» (ԳԼԿ 3) ծրագրային ձևաչափի երրորդ փուլի շրջանակում։