Մակրոպրուդենցիալ քաղաքականության հայեցակարգը
«Macro prudential»-ը ծագում է հունարեն «macros» բառից, որը նշանակում է «մեծ», և լատիներեն «prudentia» բառից, որը թարգմանվում է որպես «խոհեմություն»: «Մակրո» նախածանցը նշանակում է, որ կիրառվող կանոնները կամ գործողությունները վերաբերելի են ընդհանուր ֆինանսական համակարգին, այլ ոչ միայն մեկ հաստատությանը: «Խոհեմությունը» զգուշավոր, շրջահայաց, մտածված գործելու մասին է և, հետևաբար, խոհեմության քաղաքականությունը խելամիտ, տրամաբանական գործելն է և չարդարացված ռիսկի չդիմելը: Եվ ուրեմն, մակրոպրուդենցիալ քաղաքականությունն իրականացվում է այն նկատառումով, որ ֆինանսական համակարգի յուրաքանչյուր մասնակից զգուշավոր լինի ռիսկերի նկատմամբ, որոնք կարող են ազդել ամբողջ համակարգի վրա:
Մակրոպրուդենցիալ քաղաքականության նպատակն է ապահովել ընդհանուր ֆինանսական համակարգի կայունությունը, որպեսզի նվազագույնի հասցվեն կայուն տնտեսական աճի համար անհրաժեշտ ֆինանսական ծառայությունների (այդ թվում՝ վարկավորման) մատուցման խաթարման ռիսկը
Սա ներառում է այնպիսի քաղաքականություն, որն ուղղված է ֆինանսական համակարգի կայունության պաշարի բարձրացմանը, համակարգային ռիսկերի և դրանց հնարավոր ազդեցությունների սահմանափակմանը՝ որպես վերջնանպատակ ունենալով բարենպաստ միջավայր և նախադրյալներ ապահովել կայուն տնտեսական աճի համար:
Գործնական իմաստով, մակրոպրուդենցիալ քաղաքականությունն իրենից ներկայացնում է տարբեր տեսակի գործիքների կիրառում՝ ֆինանսական կայունության ապահովման նպատակով::
Ընդհանուր առմամբ, մակրոպրուդենցիալ քաղաքականությունն ընդգրկում է համակարգային ռիսկերի մշտադիտարկման, վերլուծությանն ու գնահատմանն ուղղված աշխատանքներ, ինչպես նաև այդ ռիսկերը մեղմելու կամ չեզոքացնելու համար անհրաժեշտ մակրոպրուդենցիալ գործիքների ընտրության և կիրառման գործընթացները` ֆինանսական համակարգն ավելի կայուն դարձնելու նպատակի համատեքստում: