Հաղորդակցման հիմնակարգ
Այս բաժինը քննարկում է ՀՀ կենտրոնական բանկի դրամավարկային քաղաքականության մշակման գործընթացի թափանցիկության և արդյունավետ հաղորդակցության հանձնառությունը՝ ընդգծելով հասարակության և այլ արտաքին շահագրգիռ կողմերի հետ վստահություն և հաշվետվողականություն ձևավորելու հարցում հստակ նպատակների և հանրային փոխըմբռնման կարևորությունը: Նկարագրվում է նաև հաղորդակցման հիմնական գործիքակազմը, որը Կենտրոնական բանկի կողմից կիրառվում է նշված նպատակներին հասնելու համար՝ շեշտադրելով դրամավարկային քաղաքականության ոլորտին վերաբերող հրապարակված հաղորդակցման փաստաթղթերի ամբողջական փաթեթը:
Մեր հաղորդակցման համակարգը կառուցված է հետևյալ հիմնարար սկզբունքների վրա.
Նպատակների հստակություն. Արդյունավետ հաղորդակցությունը սկսվում է մեր քաղաքականության նպատակների, գործիքների և այդ նպատակներին հասնելու համար կիրառվող մոտեցման հստակ ձևակերպմամբ: Նպատակների հստակությունն օգնում է հանրությանը հեշտությամբ հասկանալ դրամավարկային քաղաքականության գործողությունների դրդապատճառները և քաղաքականության որոշումների կայացման մեթոդաբանությունը: Բացի այդ, հստակ և լավ սահմանված նպատակների առկայությունը նպաստում է մեր որոշումների կայացման գործընթացի նկատմամբ վստահության ձեռքբերմանը: Սա նաև կարևոր է Կենտրոնական բանկի գործունեությունը գնահատելու համար՝ կապված քաղաքականության նպատակների և հանրության առջև հաշվետվողականությունը պահպանելու հետ:
Իմացեք ավելին Գների կայունության նպատակի մասին:Դրամավարկային քաղաքականության լայն հանրային ընկալում. Քաղաքականության մշակման վերաբերյալ հստակ և հետևողական տեղեկատվություն տրամադրելով՝ մենք նպատակ ունենք բարձրացնելու դրամավարկային քաղաքականության վերաբերյալ հանրության իրազեկվածության և ընկալման աստիճանը: Մեր հաղորդակցության համակարգը օգնում է հանրությանը հասկանալ, թե ինչպե՞ս է Կենտրոնական բանկը մտածում հետևյալ երեք կարևոր հարցերի շուրջ.
- Որտե՞ղ է այժմ տնտեսությունը:
- Որո՞նք են տնտեսության հիմնական շարժիչ ուժերը:
- Ի՞նչ է անում ԿԲ-ն իր գործիքակազմով՝ քաղաքականության նպատակներին հասնելու համար:
Դրամավարկային քաղաքականության թափանցիկության և բացության ԿԲ հանձնառություն. ՀՀ Կենտրոնական բանկը ձգտում է ապահովել դրամավարկային քաղաքականության բարձր թափանցիկություն, որը երկրի քաղաքացիների առջև ավելի մեծ հաշվետվողականության ապահովման անկյունաքարն է: Որպեսզի հանրությանն օգնենք ավելի լավ հասկանալու, թե ինչպես է մշակվում և իրականացվում դրամավարկային քաղաքականությունը և աջակցենք դրամավարկային քաղաքականության մշակման համակարգի նկատմամբ ավելի մեծ վստահության ու վստահելիության ձեռքբերմանը, մենք ապահովում ենք ԿԲ խորհրդում դրամավարկային քաղաքականության քննարկումների վերաբերյալ առավելագույն թափանցիկություն: Թափանցիկ հաղորդակցությունը նաև նշանակում է բաց լինել քաղաքականության որոշումները հիմնավորող տվյալների և վերլուծությունների վերաբերյալ: Թափանցիկ հաղորդակցությունը նաև նշանակում է լայն հանրության հետ կիսվել քաղաքականության քննարկումներին և որոշումների կայացմանն աջակցող տվյալներով և վերլուծական փաստաթղթերով:
Հաղորդակցման համապարփակ գործիքակազմ. Մեր նպատակներին հասնելու համար մենք կիրառում ենք հաղորդակցման մի շարք գործիքներ՝ հանրությանն իրականացվող դրամավարկային քաղաքականությունը ներկայացնելու և մեկնաբանելու համար, ներառյալ՝ գրավոր զեկույցներ, մամուլի ասուլիսներ, հարցազրույցներ և այլ ուղիներ: Այս գործիքներից որոշները ավելի բարդ են և ուղղված են առավելապես տեխնիկական լսարանին, մինչդեռ մյուսները նախատեսված են լայն հանրությանը պարզ և հասկանալի տեղեկատվություն ապահովելու համար: Թեև դրամավարկային քաղաքականությունը բավականին բարդ է, սակայն մեզ համար չափազանց կարևոր է դրա վերաբերյալ յուրաքանչյուր քաղաքացու հստակ պատկերացում և ըմբռնում ձևավորելու խնդիրը:
ԿԲ-ում դրամավարկային քաղաքականության հաղորդակցման համակարգը ավելի մանրամասն նկարագրված է «Դրամավարկային քաղաքականության հաղորդակցության հայեցակարգ/ձեռնարկ» փաստաթղթում:
Դրամավարկային քաղաքականության հաղորդագրություն
Յուրաքանչյուր դրամավարկային քաղաքականության որոշման հետ մենք հրապարակում ենք Դրամավարկային քաղաքականության հաղորդագրությունը (ԴՎՔՀ), որը բաղկացած է երկու մասից՝ ԿԲ խորհրդի հայտարարությունից (ներկայացնում է վերաֆինանսավորման տոկոսադրույքի վերաբերյալ որոշումը և դրա հիմնավորումը) և ԴՎՔ թիմի կողմից պատրաստված մակրոտնտեսական իրավիճակի, դրա վրա ազդող գործոնների, առկա անորոշությունների ու ռիսկերի և զարգացման սցենարների բազմության ընդհանրական պատկերից:
2026
2025
2024
Դրամավարկային քաղաքականության զեկույց
Դրամավարկային քաղաքականության զեկույցը դրամավարկային քաղաքականության հաղորդակցման հիմնական միջոցն է և հրապարակվում է եռամսյակային կտրվածքով:
Դրամավարկային քաղաքականության զեկույցը (ԴՎՔԶ) դրամավարկային քաղաքականության հաղորդակցման հիմնական միջոցն է, որըներառում է ընթացիկ մակրոտնտեսական զարգացումների և դրանք պայմանավորող գործոնների պատմողական նկարագիրը, քաղաքականության համար կարևոր հիմնական ռիսկերի ու անորոշությունների գնահատումը և զարգացման սցենարների բազմությունը:
ԴՎՔԶ-ն սկսվում է տնտեսական վերլուծության համար էական երկու բաղադրիչների գնահատմամբ՝ որտե՞ղ է այժմ տնտեսությունը և որո՞նք են տնտեսության հիմնական շարժիչ ուժերը: Զեկույցը ներկայացնում է վերլուծություն, թե ինչպե՞ս է ԿԲ-ն կառավարում ընթացիկ ռիսկերը՝ առաջնորդվելով «նվազագույն ափսոսանքի» մոտեցմամբ: Այն ներառում է քաղաքականության մշակման ընթացիկ շրջափուլում կարևորվող տարբեր անորոշությունները, ցնցումներն ու ռիսկերը՝ արտացոլելով դրանց վերաբերյալ ԿԲ խորհրդի և Թիմի, ինչպես նաև արտաքին շահագրգիռ կողմերի դատողություններն ու մտահոգությունները: Այս համատեքստում ԴՎՔԶ-ն ներկայացնում է զարգացման երկու կամ ավելի սցենար և դրանցից յուրաքանչյուրի դեպքում ԿԲ-ի քաղաքականության արձագանքը՝ իր նպատակներին հասնելու համար: Մենք հրապարակում ենք ԴՎՔԶ-ն յուրաքանչյուր եռամսյակ, տարեկան չորս անգամ՝ հետևելով հրապարակման օրացույցին: Այն հրապարակվում է տվյալ եռամսյակի քաղաքականության տոկոսադրույքի որոշման կայացման նույն օրը: Այն նախատեսված է գրեթե իրական ժամանակում որոշման կայացման ու դրա հիմնավորման վերաբերյալ հանրությանը բավարար տեղեկատվություն և վերլուծական գնահատականներ տրամադրելու համար: Մնացած չորս որոշման ամսաթվերի համար (միջանկյալ որոշման օրեր, երբ ԴՎՔ զեկույց չի հրապարակվում), Դրամավարկային քաղաքականության հաղորդագրությունը (ԴՎՔՀ) ծառայում է որպես հիմնական գրավոր հաղորդակցման միջոց՝ տրամադրելով Խորհրդի որոշման և հիմնավորման հակիրճ ամփոփումը և որոշման կայացման գործընթացին աջակցող՝ Թիմի պատրաստած մակրոտնտեսական իրավիճակի նկարագիրը:
Կենտրոնական բանկի կողմից ապագային միտված լավագույն ուղղորդումը պետք է ներառի որակական և քանակական տարրերի համադրությունը: Մեր հրապարակումներում քաղաքականության ռազմավարությունը ներկայացվում է սցենարին համահունչ քաղաքականության ուղիների հրապարակման միջոցով: Ամենակարևորն այն է, որ քաղաքականության այս ուղիներն ապահովվում են ուղեկցող պատմվածքներով, որոնք ընդգծում են սցենարներում առկա մակրոտնտեսական կայունության ռիսկերի, ինչպես նաև դրանց քաղաքականության հրամայականների միջև կապը: Քաղաքականության ռազմավարության բացահայտումը քանակական և պատմված օրինակների, այլ ոչ թե քաղաքականության արձագանքի կամ կորստի ֆունկցիայի համադրման միջոցով, ապահովում է կոնկրետություն և բարելավում է մատչելիությունը: Սա հատկապես նախընտրելի է ոչ փորձագետ սուբյեկտների համար, ովքեր կարևոր են ինչպես գների սահմանման, այնպես էլ Կենտրոնական բանկի և նրա քաղաքականության մշակման համակարգի նկատմամբ վստահության ձեռքբերման հարցում:
2026
2025
2024
Գծապատկերների փաթեթ
2026
2025
2024
Թափանցիկության զեկույց
Յուրաքանչյուր որոշման հետ մենք հրապարակում ենք առանձին փաստաթուղթ, որը թափանցիկ և մանրամասնորեն ներկայացնում է Խորհրդի որոշման հիմնավորումը: Դրա նպատակն է օգնել հանրությանն ավելի լավ հասկանալու ԿԲ քաղաքականության մշակման գործընթացը:
ՀՀ ԿԲ-ի թափանցիկության զեկույցը ներառում է հետևյալ փաստաթղթերը.
- ՀՀ ԿԲ քաղաքականության տոկոսադրույքի վերաբերյալ Խորհրդի նիստի արձանագրություն. Մեր դրամավարկային քաղաքականության մշակման համակարգի նկատմամբ ավելի մեծ վստահության և վստահելիության ձեռքբերման համար մենք ապահովում ենք ՀՀ ԿԲ խորհրդում դրամավարկային քաղաքականության հարցերի վերաբերյալ քննարկումների առավելագույն թափանցիկություն: Այս հարցում մեր նպատակն է քաղաքականության տոկոսադրույքի քննարկումների ընթացքի վերաբերյալ տեղեկությունների տրամադրման միջոցով հանրության մոտ հստակ պատկերացում ձևավորել յուրաքանչյուր որոշմանն օժանդակող գործոնների, դատողությունների և հիմնավորումների մասին: Մեր արձանագրություններն ամփոփում են քաղաքականության տոկոսադրույքի նիստի ընթացքում տեղի ունեցած քննարկումներն ու արված եզրահանգումները: Դրանք ներառում են մանրամասներ ձևավորված տնտեսական իրավիճակի, քաղաքականության մշակման տվյալ շրջափուլում կարևորվող ռիսկերի և անորոշության ոլորտների, ինչպես նաև այլ տեղեկությունների վերաբերյալ: Հարկ է նշել, որ արձանագրությունները վերագրվում են, ինչը նշանակում է, որ քաղաքականություն մշակողների անունները կցվում են քննարկումների ընթացքում նրանց համապատասխան հայտարարություններին կամ դիրքորոշումներին: Սա ապահովում է հաշվետվողականության շատ բարձր մակարդակ՝ դրանով իսկ հնարավորություն տալով Խորհրդի անդամներին ներկայացնելու իրենց տեսակետները (ներառյալ մեծամասնության կարծիքից հնարավոր այլակարծությունը) հանրությանը հայտնի եղանակով: Արձանագրությունները հրապարակվում են քաղաքականության տոկոսադրույքի որոշման կայացման նույն օրը:
- Վերջնական քվեարկության բացատրություններ. Օրենքը պահանջում է, որ ՀՀ ԿԲ խորհուրդն իր որոշումները կայացնի ձայների մեծամասնությամբ, այլ ոչ համաձայնության սկզբունքով: Դա նշանակում է, որ Խորհրդի առանձին անդամները կարող են տարբեր կարծիքներ ունենալ քաղաքականության առանցքային թեմաների վերաբերյալ (ներառյալ վերջնական քվեարկությունը), ինչը բաց հասարակությունում որոշումների կայացման գործընթացի ողջամիտ մասն է: Հանրությանն առավելագույն թափանցիկ տեղեկատվություն ապահովելու համար, որը վերաբերում է որոշման կայացմանն ու Խորհրդի անդամների ինստիտուցիոնալ տեսակետների տարբերությանը, մենք հրապարակում ենք Խորհրդի առանձին անդամների վերջնական քվեարկության մեկնաբանությունները: Այս փաստաթուղթը ներկայացնում է Խորհրդի յուրաքանչյուր անդամի դիրքորոշման հակիրճ, մեկ պարբերությունից բաղկացած ամփոփումը, որը նկարագրում է նրանց քվեարկության արդյունքը և դրա հիմնավորումը: Սա Խորհրդի առանձին անդամների համար հաշվետվողականություն ապահովելու լավագույն միջոցն է՝ միաժամանակ նրանց հնարավորություն տալով ներկայացնելու տնտեսական հեռանկարի տեսանկյունից, իրենց պատկերացմամբ, առավել հրատապ և կարևոր ռիսկերն ու խնդիրները: Այս փաստաթուղթն արտահայտում է դրամավարկային քաղաքականության որոշումների կայացման գործընթացի առանցքային մասը կազմող բազմազան գործոնների առավել լիարժեք պատկերը:
2026
2025
2024
Դրամավարկային քաղաքականության որոշման ամսաթվեր
Քաղաքականության տոկոսադրույքի որոշմանն առնչվող փաստաթղթեր (արխիվ)
Մամուլի ասուլիս
2020 թվականի հունիսից դրամավարկային քաղաքականության որոշումները ներկայացվում են ՀՀ ԿԲ նախագահի գլխավորած մամուլի ասուլիսում: Այն ևս մեկ գործիք է լայն հանրությանն ու լրատվամիջոցներին հստակ մեկնաբանելու դրամավարկային քաղաքականության ուղղությունների և վերաֆինանսավորման տոկոսադրույքի վերաբերյալ ԿԲ խորհրդի կայացրած որոշման հիմնական դատողություններն ու տնտեսական հիմնավորումը: Ասուլիսն ուղիղ հեռարձակվում է մեր տարբեր առցանց հարթակներում (Facebook, YouTube և այլն) յուրաքանչյուր որոշման կայացման օրվա ժամը 14:00-ին:
Ֆինանսական շուկայի վերլուծաբանների հետ հանդիպում
2024 թվականի սեպտեմբերից ավելի տեխնիկական ուղղվածություն ունեցող լսարանի համար, ինչպիսիք են՝ շուկայի վերլուծաբանները, գիտնականները, առևտրային բանկերի ներկայացուցիչները և այլք, եռամսյակային պարբերականությամբ, որոշման կայացման հաջորդ օրն անց է կացվում տեխնիկական հանդիպում՝: Դա հարթակ է տրամադրում լսարանին՝ տեխնիկական մակարդակի պարզաբանումներ ստանալ ՀՀ ԿԲ-ի տնտեսական վերլուծությունների, մոդելավորման գործիքների և մասնակիցներին հուզող այլ հարցերի վերաբերյալ: Հանդիպումը վարում են Դրամավարկային քաղաքականության վարչության պետը և քաղաքականության մշակման տվյալ շրջափուլը կազմակերպող խմբի անդամները: Իմանալ ավելին: