Դրամավարկային քաղաքականության թափանցիկություն
Այս բաժնում քննարկվում է ՀՀ կենտրոնական բանկի քաղաքականության մշակման գորընթացում թափանցիկության և հաշվետվողականության ապահովման հանձնառությունը՝ ընդգծելով հանրային վստահության ձևավորման և արդյունավետ որոշումների կայացման ապահովման հարցում հստակ հաղորդակցության կարևորությունը:
Որպես սոցիալապես պատասխանատու պետական կառույց, մենք խստորեն պաշտպանում ենք թափանցիկության և հաշվետվողականության հիմնարար և ուղղորդող սկզբունքները: Մենք խորապես համոզված ենք, որ հստակ և արդյունավետ հաղորդակցությանմիջոցով Կենտրոնական բանկը կարող է հասնել իր քաղաքականության մշակման ու իրականացման գործընթացի առավել թափանցիկության: Ավելին, թափանցիկությունը ԿԲ-ի հաշվետվողականության հիմնաքարն է: Դրանք նպաստում են ՀՀ ԿԲ-ի դրամավարկային քաղաքականության մշակման գործընթացի նկատմամբ հանրության վստահության ապահովմանը և ԿԲ ղեկավարության ու Թիմի կողմից ճիշտ և նպատակային որոշումների կայացմանը:Քաղաքականության մշակման ներկայիս համակարգի՝ ԿՔՎՀ-2-ի ներքո՝ մենք ձգտում ենք ապահովել թափանցիկ հաղորդակցություն այն մասին, թե ինչպե՞ս և ինչու՞ ենք կայացնում մեր դրամավարկային քաղաքականության որոշումները: Մենք կարևորում ենք հաղորդակցության կենտրոնացումն այն հիմնական ռիսկերի և անորոշությունների վրա, որոնք առավել արդիական են քաղաքականության մշակման տվյալ շևջափուլում: Մենք չենք հրապարակում հիմնական սցենար (որը ներկայացնում է Կենտրոնական բանկի լավագույն կանխատեսումը «առավել հավանական» ապագայի վերաբերյալ), քանի որ այն տալիս է անհայտ ապագայի կանխատեսման նկատմամբ կեղծ վստահություն: Փոխարենը, մենք տնտեսության և քաղաքականության շուրջ քննարկումներում հաշվի ենք առնում առավել էական ռիսկերն ու անորոշությունները և դրանց նյութականացման դեպքում առաջարկում ենք քաղաքականության համապատասխան արձագանք: Դա նաև լայն հանրությանը տրամադրում է կարևոր տեղեկություն՝ տնտեսական հեռանկարի հետ կապված հիմնական ռիսկերն ու խնդիրները հասկանալու և լիարժեք տեղեկացված ֆինանսական ու տնտեսական որոշումներ կայացնելու համար: Լրացուցիչ մանրամասները կարող եք գտնել «ԿՔՎՀ-2-ը ՀՀ կենտրոնական բանկում: Տեսություն և պրակտիկա» գրքում: Քաղաքականության գործողությունների բացությունն ու թափանցիկությունն ապահովելու համար մենք պարբերաբար հրապարակում ենք մի շարք փաստաթղթեր, որոնք մանրամասն տեղեկություններ են տրամադրում մեր տնտեսության ընթացիկ զարգացումների, դրամավարկային քաղաքականության իրականացման և այլ կարևոր թեմաների վերաբերյալ:
Վերլուծական թափանցիկություն
Հանրության հետ թափանցիկ հաղորդակցությունը նշանակում է նաև բաց լինել քաղաքականության քննարկումներին և որոշումների կայացմանն օժանդակող տվյալների և վերլուծությունների տրամադրման հարցում: Այդ նպատակով, դրամավարկային քաղաքականության յուրաքանչյուր զեկույցի հետ մեկտեղ, մենք հրապարակում ենք քաղաքականության վերլուծության մեջ օգտագործված համապատասխան վերլուծական մոդելները և տվյալների շտեմարանները: Դա ներառում է տարբեր տնտեսական ցուցանիշների, ֆինանսական շուկայի տվյալների, մեր հիմնական առևտրային գործընկերների զարգացումների և մեր վերլուծության մեջ օգտագործված այլ համապատասխան վիճակագրական տվյալների վերաբերյալ ժամանակին և համապարփակ տեղեկատվություն: