Ինչպես ենք հաղորդակցում մեր որոշումները
Այս բաժնում ներկայացվում է ՀՀ ԿԲ դրամավարկային քաղաքականության հաղորդակցման համակարգը: Որպես սոցիալապես պատասխանատու պետական կառույց՝ մենք վճռականորեն պահպանում ենք թափանցիկության և հաշվետվողականության հիմնարար և առաջնորդող սկզբունքները:
ՀՀ կենտրոնական բանկում դրամավարկային քաղաքականության թափանցիկությունը և արդյունավետ հաղորդակցումը հանրության, ֆինանսական շուկաների և այլ շահագրգիռ կողմերի շրջանում վստահություն, հավաստիություն և փոխըմբռնում ձևավորելու կարևորագույն հիմքն են: Հստակ հաղորդակցության և թափանցիկության բարձր մակարդակի ձեռքբերման մեր հանձնառությունը նպատակաուղղված է հանրության և արտաքին շահագրգիռ կողմերի՝ մեր որոշումների և դրանց հիմնավորման լիովին ըմբռնման ապահովմանը:
Մենք օգտագործում ենք համապարփակ գործիքակազմ՝ դրամավարկային քաղաքականության որոշումներնու մեթոդաբանությունը մեր լսարանին հաղորդակցելու համար: Դա ներառում է գրավոր զեկույցներ, լրատվամիջոցների ճեպազրույցներ, հարցազրույցներ և առցանց հարթակներ, որոնք հարմարեցված են ինչպես ընդհանուր, այնպես էլ տեխնիկական լսարանի համար: Մեր հաղորդակցության օպերատիվ փաստաթուղթը Դրամավարկային քաղաքականության հաղորդագրությունն է (EMPS), որը հրապարակվում է դրամավարկային քաղաքականության յուրաքանչյուր որոշման հետ: Այն մեկնաբանում է վերաֆինանսավորման տոկոսադրույքի վերաբերյալ ԿԲ-ի որոշումը և դրա հստակ հիմնավորումը: Բացի այդ, ԴՎՔ հաղորդագրությունը ներկայացնում է մակրոտնտեսական փաստացի իրավիճակի և դա պայմանավորող գործոնների բարձրորակ գնահատական, որպեսզի հանրությունը ոչ միայն հասկանա, թե ինչ որոշում է կայացվել, այլ նաև ինչու է այն ընդունվել:
Դրամավարկային քաղաքականության հաղորդակցության կարևորագույն գործիքը Դրամավարկային քաղաքականության զեկույցն է (MPR), որը հրապարակվում է եռամսյակային կտրվածքով: Այս փաստաթղթի նպատակն է պարզ և համակարգված ձևով ներկայացնել ԿԲ-ի կողմից իր քաղաքականության մշակման գործընթացն ու դրա իրականացումը: Այն ներառում է ընթացիկ մակրոտնտեսական զարգացումների և դրա ազդեցության գործոնների պատմողական բացատրությունները, քաղաքականությանն առնչվող հիմնական ռիսկերի գնահատումը, ինչպես նաև զարգացման սցենարների բազմությունը: Բացի այդ, քաղաքականության տոկոսադրույքի յուրաքանչյուր որոշումից հետո մենք հրավիրում ենք մամուլի ասուլիս` լայն հանրությանն ու լրատվամիջոցներին ներկայացնելով որոշման մատչելի բացատրությունը: Տեխնիկապես ավելի կողմնորոշված լսարանի՝ ֆինանսական շուկայի վերլուծաբանների հետ մենք եռամսյակային հանդիպումներ ենք անցկացնում, որտեղ փորձագետները կարող են ստանալ դրամավարկային քաղաքականության ոլորտի վերաբերյալ իրենց հուզող հարցերի պատասխանները:
Թափանցիկության և հաշվետվողականության ապահովման հանձնառության ներքո՝ յուրաքանչյուր որոշումից հետո մենք հրապարակում ենք նաև Թափանցիկության զեկույցը, որը ներառում է ԿԲ խորհրդի նիստի արձանագրությունը և Խորհրդի յուրաքանչյուր անդամի՝ քաղաքականության տոկոսադրույքի վերաբերյալ քվեարկության հիմնավորումը:
Այս տեղեկատվության լայն տարածմամբ մենք նպատակ ունենք ավելի հասկանալի դարձնել մեր որոշումների կայացման գործընթացը, բարձրացնել ԿԲ նկատմամբ հասարակության վստահության մակարդակը և ապահովել թափանցիկության ու հաշվետվողականության մեր հիմնական սկզբունքները: