Գնաճի ճկուն նպատակադրման ռազմավարություն
Այս ենթաբաժինը նկարագրում է Կենտրոնական բանկի դրամավարկային քաղաքականության գործող ռազմավարությունը, որը հայտնի է որպես գնաճի ճկուն նպատակադրում: Այն երաշխավորում է գների կայունության ապահովումն առանց ավելորդ տնտեսական և ֆինանսական անկայունության: Դա տնտեսական ցնցումներին արձագանքելու խելամիտ մոտեցում է և արտացոլում է այն փաստը, որ քաղաքականության որոշումների ազդեցությունը փոխանցվում է տնտեսությանը որոշակի ժամանակ անց:
Գնաճի 3% հաստատուն մակարդակ պահպանելը ոչ միշտ է իրագործելի կամ նպատակահարմար: ՀՀ կենտրոնական բանկն առաջնորդվում է ճկուն գնաճի նպատակադրման ռազմավարությամբ, ինչը նշանակում է, որ իրականացվող դրամավարկային քաղաքականությունն ուղղված է միջնաժամկետում (1-3 տարվա հորիզոնում) գների կայունության նպատակի ապահովմանը: ԿԲ-ն չի ձգտում գնաճն անմիջապես վերադարձնել թիրախին և չի նպատակադրում գնաճը յուրաքանչյուր ժամանակաշրջանի համար: Դա պայմանավորված է մի շարք գործոններով. նախ՝ դրամավարկային քաղաքականության միջոցառումներն ազդում են տնտեսության վրա որոշ ժամանակ անց: Երկրորդ՝ գնաճը թիրախին չափազանց արագ վերադարձնելու փորձը կարող է առաջացնել տնտեսական և ֆինանսական անկայունություն: Վերջապես, տնտեսությունը դինամիկ է և ենթարկվում է Կենտրոնական բանկի վերահսկողությունից դուրս մի շարք ցնցումների, որոնցից են, մասնավորապես, միջազգային ապրանքային շուկաներում մատակարարման շղթաների ժամանակավոր խաթարումները, սննդամթերքի գների փոփոխությունները և այլն: ԿԲ-ն արձագանքում է նման իրավիճակներին միայն այն դեպքում, երբ դրանք արտահայտվում են գնաճային սպասումների ավելացմամբ և խոչընդոտում են միջնաժամկետ հեռանկարում գնաճի թիրախի ապահովմանը:
Չնայած ԿԲ-ն սահմանում է միջնաժամկետ հորիզոնում գնաճի տարեկան 3% նպատակային ցուցանիշ, գնաճի ճկուն նպատակադրման ռազմավարության ներքո նաև ընդունում է վերոնշյալ նկատառումների կարևորությունը, ինչից ելներով՝ համապատասխան իրավական ակտերում ամրագրվում է գնաճի թիրախից +/- 1.0 տոկոսային կետ տատանման թույլատրելի միջակայք:
Բացի այդ, գնաճի ճկուն նպատակադրումը տնտեսական գործակալների և հանրության շրջանում վստահության հիմքեր է ստեղծում, որ գնաճի թիրախից ցանկացած շեղում ժամանակավոր է: Քանի որ Կենտրոնական բանկն ունի գնաճի թիրախի ապահովմանն ուղղված դրամավարկային քաղաքականության մշակման արդյունավետ համակարգ, գործակալները կարող են վստահ լինել, որ գների կարճաժամկետ փոփոխությունների դեպքում կարիք չեն ունենա ճշգրտվելու իրենց միջնաժամկետ և երկարաժամկետ գնաճային սպասումները
Կենտրոնական բանկերն իրենց հիմնական նպատակի՝ գների կայունության ապահովման համար կարող են ընտրել դրամավարկային քաղաքականության տարբեր ռեժիմներ, այդ թվում՝ գնաճի նպատակադրում, փոխարժեքի նպատակադրում, փողի ագրեգատների նպատակադրում և այլն: 2006 թվականի հունվարից ՀՀ կենտրոնական բանկն անցում է կատարել գնաճի նպատակադրման ռազմավարությանը: Դրա շրջանակում միջանկյալ նպատակ է սահմանվում գնաճ-տնտեսական աճ երկընտրանքի ապահովումը (հասարակության համար նվազագույն ծախսերով գների կայունության ապահովում)՝ առաջնորդվելով «նվազագույն ափսոսանքի» մոտեցմամբ: Գործառնական նպատակ է սահմանվում կարճաժամկետ տոկոսադրույքը: ԿԲ-ն անկախ է իր դրամավարկային քաղաքականության ռազմավարությունը, միջանկյալ և գործառնական նպատակները ընտրելու հարցում: