Ինչ է գների կայունությունը
Այս բաժինը ներկայացնում է տնտեսության մեջ գների կայունության կարևորությունը, այդ թվում՝ թե ինչպե՞ս է Կենտրոնական բանկը սահմանում և ապահովում գների կայունության իր հիմնական նպատակը:
Գների կայունությունը նվազեցնում է ապագա գնաճի հետ կապված անորոշությունը, աջակցում է ավելի տեղեկացված որոշումների կայացմանը, նպաստում է երկարաժամկետ կայուն տնտեսական աճի համար բարենպաստ պայմանների ձևավորմանը, պահպանում է գնողունակությունը և ազգային մրցունակությունը համաշխարհային տնտեսությունում: Այս առումով՝ գների կայունությունը երկարաժամկետ տնտեսական բարեկեցության ապահովման կարևոր պայման է:
Այնուհետև քննարկվում է ԿԲ-ի գների կայունության նպատակը, որի ապահովումը, Սահմանադրությամբ և օրենքով ամրագրված դրույթների համաձայն, ֆինանսական կայունության ապահովում հետ մեկտեղ, ԿԲ-ի հիմնական նպատակներից մեկն է: ԿԲ-ն գների կայունությունը սահմանում է որպես ցածր և կայուն գնաճի մակարդակ՝ գնաճային սպասումների խարսխմամբ: Գների կայունությունը սահմանելու և ապահովելու համար ՀՀ կենտրոնական բանկը սահմանում է միջնաժամկետ գնաճի թվային թիրախ, որը համահունչ է գների կայունության իր պատկերացումներին: Գնաճը ժամանակի ընթացքում տնտեսությունում ապրանքների և ծառայությունների գների ընդհանուր աճն է: Հայաստանում գնաճը չափվում է Սպառողական գների ինդեքսի (ՍԳԻ) միջոցով, որը ներառում է տնային տնտեսությունների կողմից սովորաբար գնվող ապրանքների և ծառայությունների գների փոփոխությունները: ԿԲ-ն դիտարկում է նաև գնաճի այլ ցուցանիշներ, ինչպիսիք են՝ բնականոն գնաճը և ոչ արտահանելի կոշտ գների աճը՝ գնաճային միջավայրը և դրա վրա ազդող գործոնները ավելի լավ հասկանալու համար:
Գների կայունության իր նպատակի ապահովման համար ԿԲ-ն առաջնորդվում է գնաճի ճկուն նպատակադրման ռազմավարությամբ, որը երաշխավորում է գների կայունության ապահովում առանց ավելորդ տնտեսական և ֆինանսական անկայունության: Այն իրենից ներկայացնում է տնտեսական ցնցումներին արձագանքելու խելամիտ մոտեցում և արտացոլում է այն փաստը, որ քաղաքականության գործողությունները տնտեսություն են փոխանցվում որոշակի ժամանակային լագով: