ԿԲ կարողություններ
ԿԲ կարողությունների զարգացում
Կենտրոնական բանկի ներքին կարողությունների զարգացումը ազդեցության տիրույթում ամրագրված առաջնահերթությունների իրագործման կարևորագույն նախապայման է:
Մարդիկ, տեխնոլոգիաները, կառավարումը և տվյալները սերտ փոխկապակցված են, և նրանց որակից ու համահունչ գործունեությունից է հետևում հանրային քաղաքականության հաջող իրականացումը։
Կենտրոնական բանկը, որպես երկարաժամկետ զարգացմանը միտված կառույց, հետևում է բնապահպանական, սոցիալական և կառավարչական սկզբունքներին, որոնք կենսակայունության հենասյուներն են:
Մարդիկ
Մեր աշխատակիցները Կենտրոնական բանկում աշխատելն ընկալում են որպես կոչում՝ իրենց ներդրումն ունենալով հանրային բարեկեցության ապահովման մեջ:
Մենք ստեղծում ենք միջավայր և պայմաններ, որտեղ մեր աշխատակիցները՝
- ունեն աշխատանքի նկատմամբ սեփականության և պատասխանատվության հստակ զգացում, առաջնորդվում են ընդհանուր թիմային ոգով և պատրաստ են համագործակցության,
- աշխատում են արդյունքի ապահովման ուղղությամբ՝ միաժամանակ պահպանելով փոխադարձ հարգանքն ու վստահությունը,
- արժևորում են գիտելիքը, մշտապես պատրաստ են փոխանցել այն և սովորել, ձգտում են ինքնակատարելագործման,
- վստահ են բազմազանության, հավասարության և ներառականության սկզբունքների ապահովման մեջ՝ բացառելով խտրականության ցանկացած դրսևորում:
Համակարգեր
Համակարգերի միջոցով մենք ապահովում ենք այն ամենը, ինչն անհրաժեշտ է մարդկանց՝ իրացնելու իրենց կարողությունները և ստեղծելու հանրային նոր արժեք։
Դրանք՝
- ապահովում են աշխատակիցներին հարմար ֆիզիկական ենթակառուցվածք, որը նաև խթանում է մարդկանց համագործակցությունը և հոգ է տանում շրջակա միջավայրի մասին,
- հնարավորություն են տալիս աշխատանքը կատարելու ամենաառաջադիմական սարքավորումների և ՏՏ միջավայրում՝ միավորելով միջավայրը և մարդակենտրոնությունը,
- նախագծվում և ներդրվում են «արժեք՝ փողի դիմաց» սկզբունքով,
- պահպանում են ֆիզիկական և տեղեկատվական անվտանգության ամենաբարձր չափանիշները՝ առանց սահմանափակելու մարդկանց գործունեությունը։
Կառավարում
Կառավարման ներքո մենք պետք է առաջնորդվենք մեր արժեքներով ու համախմբվենք առաջնահերթությունների շուրջ։
Կառավարման նպատակն է՝
- ապահովել նպատակների և գործընթացների հստակություն,
- համադրել աշխատակիցների պատասխանատվությունը և անհրաժեշտ ու բավարար իրավասությունները,
- նպաստել հիմնավոր՝ տվյալների և հետազոտությունների վրա ձևավորված արդյունավետ որոշումների կայացմանը,
- խրախուսել ստեղծագործությունը և նորարարությունը՝ միաժամանակ օգնելով աշխատակիցներին՝ կառավարելու ռիսկերը:
Տվյալներ
Տվյալները մեզ համար ռազմավարական ակտիվ և անկյունաքարն են մեր բոլոր որոշումների։
Մենք պետք է ունենանք.
- ժամանակին, ամբողջական, արժանահավատ և հասանելի տվյալներ, որոնք թույլ կտան պատրաստել և կայացնել տեղեկատվության վրա հիմնված (data driven) որոշումներ,
- տվյալների կառավարման այնպիսի մոտեցումներ, որոնք կոչված են ապահովելու ոչ միայն ներկա, այլև ապագա կարիքները,
- տվյալները որպես հանրային բարիք ընկալելու և համապատասխան քաղաքականություն իրականացնելու հմտություն,
- տվյալների կառավարման սկզբունքները («մեկ տվյալը` մեկ անգամ», «հասանելիություն կարիքի դեպքում» և այլն) առօրյա աշխատանքում կիրառող համայնք: