Անուշ Գրիգորյան
Ֆինանսներ
Անուշ Գրիգորյանը ստանձնել է Ֆինանսական տնօրենի պաշտոնը 2021 թվականի հուլիսի 14-ին։ Անուշ Գրիգորյանը պատասխանատու է Կենտրոնական բանկի բյուջետավորման, ֆինանսական հաշվետվությունների եւ ֆինանսական հաշվառման գործառույթների համար։ Նախքան այս պաշտոնը, Անուշ Գրիգորյանը երկու տարի զբաղեցրել է Կենտրոնական բանկի բյուջետավորման և հաշվետվությունների բաժնի ղեկավարի պաշտոնը։
Մինչ Կենտրոնական բանկին միանալը տիկին Գրիգորյանը կուտակել է ավելի քան 10 տարվա փորձ արտաքին աուդիտի և ֆինանսական հաշվետվությունների պատրաստման ոլորտներում` աշխատելով տեղական և միջազգային մի շարք առաջատար կազմակերպություններում:
Կենտրոնական բանկի գործունեության հետ համատեղ Անուշ Գրիգորյանը զբաղեցրել է նաև մի քանի այլ պաշտոններ: 2021թ-ից հանդիսացել է Հայաստանի աուդիտորների և փորձագետ հաշվապահների պալատի խորհրդի անդամ, իսկ այժմ զբաղեցնում է Հաշվապահության և աուդիտի հանրային վերահսկողության խորհրդի անդամի պաշտոնը։ Միաժամանակ, 2022 թվականի մայիսից տիկին Գրիգորյանը հանդես է գալիս նաև որպես Արժույթի միջազգային հիմնադրամի (IMF) անկախ փորձագետ, մասնակցելով տեխնիկական աջակցության առաքելություններին՝ կենտրոնական բանկերում ֆինանսական հաշվետվությունների միջազգային ստանդարտների (ՖՀՄՍ) ներդրման ուղղությամբ:
Տիկին Գրիգորյանը ունի մոտ 10 տարվա դասավանդման փորձ ՖՀՄՍ-երի գծով, հանդիսանում է Միացյալ Թագավորության Որակավորված երդվյալ հաշվապահների ասոցիացիայի անդամ (FCCA), սերտիֆիկացված ներքին աուդիտոր (CIA) և Հայաստանի Հանրապետությունում օրենքով սահմանված արտաքին աուդիտոր։
Նա 2005 թվականին ավարտել է Հայաստանի պետական տնտեսագիտական համալսարանը։ 2022 թվականին ավարտել է Գործադիր կառավարման (GECM) ծրագիրը Հայաստանի ամերիկյան համալսարանում։ Ներկայումս նա սովորում է Ստենֆորդի համալսարանի «Stanford Business School»-ի LEAD կառավարման ծրագրում։