Կենտրոնական բանկ

Շրջանառության մեջ է դրվել «Օհան Դուրյան-100» հուշադրամը

ՀՀ կենտրոնական բանկը 2022 թվականի սեպտեմբերի 13-ից շրջանառության մեջ է դրել «Օհան Դուրյան-100» արծաթե հուշադրամը:

Օհան Դուրյանի ծննդյան 100-ամյակին նվիրված հուշադրամ

ՕՀԱՆ ԴՈՒՐՅԱՆԸ (Օհանես Խաչատուրյան, 1922-2011 թթ.) հայ մեծանուն դիրիժոր է, կոմպոզիտոր, Հայկական ԽՍՀ ժողովրդական արտիստ (1967 թ.):

Ծնվել է Երուսաղեմում, երաժշտական մկրտությունը ստացել է Երուսաղեմի կոնսերվատորիայում, դիրիժորական վարպետությունը կատարելագործել Փարիզում, Վիեննայում:

1957-1974 թթ., ինչպես նաև 1991-1994 թթ. եղել է Հայաստանի պետական սիմֆոնիկ նվագախմբի դիրիժորը, հեռուստատեսության և ռադիոյի սիմֆոնիկ նվագախմբի գեղարվեստական ղեկավարը, Ալ. Սպենդիարյանի անվան օպերայի և բալետի ակադեմիական թատրոնի գլխավոր դիրիժորը:

Ստեղծագործական գործունեությունը ծավալվել է նաև Հայաստանի սահմաններից դուրս: 1962-1969 թթ. ղեկավարել է Լայպցիգի «Գևանդհաուզ» նվագախումբը և օպերայի նվագախումբը, 1987-1990 թթ. եղել է Ավինյոնի օպերային թատրոնի երաժշտական ղեկավարը: Հանդես է եկել աշխարհի ավելի քան 110, այդ թվում՝ Վիեննայի օպերայի, Բեռլինի ֆիլհարմոնիայի, Մոսկվայի սիմֆոնիկ նվագախմբերի հետ:

Մաեստրո Դուրյանը գերել ու հմայել է հանդիսատեսին իր «խոսող» ձեռքերի շնորհիվ՝ չգործածելով պարտիտուր ու դիրիժորական փայտիկ: Գրել է «Ձոն Հայրենիքիս» երկը (խոսք՝ Ավ. Իսահակյանի, 1945 թ.), 4 պաստորալ կամերային նվագախմբի համար (1952-1953 թթ.), օրատորիա Կոմիտասի երկերի թեմաներով (1955 թ.), «Կոմիտասական» 2 սյուիտ սիմֆոնիկ նվագախմբի համար (1962 թ., 1971 թ.), ստեղծել է «Ունիվերսալիզմ» երաժշտական համակարգը (1975 թ.):

Պարգևատրվել է «Մովսես Խորենացի» մեդալով (1996 թ.), «Սուրբ Մեսրոպ Մաշտոց» շքանշանով (1997 թ.), արժանացել է Ֆրանսիայի արվեստների և գրականության շքանշանի ասպետի կոչմանը (1998 թ.):

Դիմերես՝ Օհան Դուրյանի հեղինակած «Ունիվերսալիզմ» ստեղծագործությունից հատված և նրա ստորագրությունը:
Դարձերես՝ Օհան Դուրյանի դիմանկարը և նրա «խոսող» ձեռքերը:

Էսքիզների հեղինակ՝ Վարդան Վարդանյան:
Հուշադրամը հատվել է Լեհաստանի դրամահատարանում:

Տեխնիկական չափանիշներ

Անվանական արժեքը (դրամ)	1000
Մետաղը, հարգը	արծաթ, 925
Քաշը (գ)	33.60
Տրամագիծը (մմ)	40.00
Թողարկման քանակը (հատ)	200
Դրամաշուրթը	ատամնավոր
Որակը	պրուֆ

Ծանուցում

Հուշադրամները թանկարժեք մետաղներից պատրաստված դրամներ են, որոնք թողարկվում են երկրի ազգային, միջազգային, պատմամշակութային, հոգևոր և այլ արժեքները հասարակությանը ներկայացնելու, դրանք մետաղի տեսքով հավերժացնելու, ինչպես նաև դրամագիտական շուկայի պահանջարկը բավարարելու նպատակով:

Ինչպես ցանկացած դրամ, հուշադրամներն ունեն անվանական արժեք, որով և ներկայանում են որպես վճարամիջոց: Սակայն հուշադրամների անվանական արժեքը շատ ավելի ցածր է ինքնարժեքից, որը բաղկացած է հուշադրամի պատրաստման համար օգտագործված թանկարժեք մետաղի արժեքից, արտադրության և այլ ծախսերից: Ցածր անվանական արժեքն ու բարձր ինքնարժեքը հնարավորություն են տալիս այս տեսակի դրամը դիտարկելու ոչ թե որպես դրամաշրջանառության մեջ օգտագործվող վճարամիջոց, այլ որպես հավաքորդական առարկա: Հուշադրամներն ունեն նաև ՀՀ կենտրոնական բանկի կողմից սահմանված վաճառքի գին:

Հուշադրամները՝ հանդիսանալով հավաքորդական առարկա, թողարկվում են խիստ սահմանափակ քանակով և չեն վերաթողարկվում:

մանափակ քանակով և չեն վերաթողարկվում: Դրամագետները, հավաքորդներն ու պարզապես ցանկացողները կարող են գնել ՀՀ հուշադրամները ՀՀ կենտրոնական բանկի «Դրամագետ» վաճառասրահից, որը գործում է բանկի ներսում և բաց է բոլորի համար: