Մարտին Գալստյան
ԿԲ նախագահ
Մարտին Գալստյանը ՀՀ կենտրոնական բանկի նախագահն է 2020 թվականի հունիսի 13-ից։ 2026 թվականի մայիսի 5-ին Ազգային ժողովի կողմից Մարտին Գալստյանը վերընտրվել է ՀՀ կենտրոնական բանկի նախագահի պաշտոնում: Նա նշանակալի ներդրում է ունեցել երկրի դրամավարկային քաղաքականության ձևավորման, ֆինանսական շուկաների զարգացման և վիճակագրական համակարգերի կատարելագործման գործում։ Նրա ղեկավարությամբ իրականացվել են կարևոր բարեփոխումներ Կենտրոնական բանկի կառավարման և կանխատեսումների մշակման ոլորտներում:
Մինչև ԿԲ նախագահ նշանակվելը, Մարտին Գալստյանը 2018-2020 թվականներին եղել է ՀՀ ԿԲ խորհրդի անդամ: Դրան նախորդած տարիներին՝ 2015-2018 թվականներին, գլխավորել է Դիլիջանի ուսումնահետազոտական կենտրոնը՝ կենտրոնանալով մասնագիտական վերապատրաստման, հետազոտությունների և քաղաքականության մշակման վրա: 2006-2015 թվականներին ղեկավարել է ՀՀ ԿԲ վիճակագրության վարչությունը՝ կարևոր դեր խաղալով վիճակագրական տվյալների հավաքման և վերլուծության համակարգերի զարգացման գործում:
Մարտին Գալստյանը Կենտրոնական բանկում իր աշխատանքը սկսել է 1998 թվականին՝ որպես մասնագետ, ֆինանսական շուկաների վարչությունում։ Այնուհետև եղել է պորտֆելի ավագ կառավարիչ, 2004-2005 թվականներին՝ միջազգային պահուստների կառավարման բաժնի պետ, իսկ 2005-2006 թվականներին՝ տնտեսական վիճակագրության զարգացման բաժնի պետ։
Կենտրոնական բանկում իր երկարամյա գործունեության ընթացքում Մարտին Գալստյանը նաև ակտիվ ներգրավված է եղել կրթական և միջազգային խորհրդատվական գործունեության մեջ։ 2015 թվականից դասավանդում է Հայաստանի ամերիկյան համալսարանում՝ «Մրցունակություն և կլաստերներ» առարկան, ինչպես նաև հանդես է գալիս Հարվարդի բիզնես դպրոցի արտոնագրված ծրագրի շրջանակում։ 2015 թվականին ճանաչվել է Հայաստանի ամերիկյան համալսարանի լավագույն դասախոս։ Նա հանդիսանում է նաև Համաշխարհային բանկի միջազգային խորհրդատու և դասախոս:
Ծնվել է Երևանում՝ 1978 թվականի մայիսի 4-ին։ 1994-1999 թվականներին սովորել է Երևանի պետական համալսարանի տնտեսագիտության ֆակուլտետում։ 1999-2002 թվականներին ուսանել է ԵՊՀ ասպիրանտուրայում և ստացել տնտեսագիտության թեկնածուի գիտական աստիճան։ 2009-2010 թվականներին սովորել է Հարվարդի համալսարանի Ջոն Ֆ. Քենեդու անվան կառավարման դպրոցում՝ ստանալով հանրային կառավարման մագիստրոսի կոչում։
Մարտին Գալստյանը մի շարք մասնագիտական հոդվածների և հրապարակումների հեղինակ է՝ ընդգրկված տնտեսագիտության, վիճակագրության և բանկային քաղաքականության ոլորտներում։