Կենտրոնական բանկ

Ուղղված է՝ ՀՀ տարածքում գործող բոլոր առևտրային բանկերին

Պատճենը՝
Վճարահաշվարկային կազմակերպություններին
Վճարահաշվարկային կազմակերպությունների ասոցիացիա

Առարկան՝ «ԿՈՆՏԱԿՏ» վճարահաշվարկային համակարգով փոխանցվող գումարների վերաբերյալ հաճախորդներին տեղեկացնելու մասին

Հարգելի՛ տիկնայք և պարոնայք,

Տեղեկացնում ենք ձեզ, որ Հայաստանի Հանրապետության Կենտրոնական բանկը (այսուհետ՝ Կենտրոնական բանկ) ստանում է բազմաթիվ բողոքներ «ԿՈՆՏԱԿՏ» վճարահաշվարկային համակարգով արտերկրից փոխանցված գումարները ՀՀ տարածքում չստանալու վերաբերյալ: Մասնավորապես, բանկերը հաճախորդներին հայտնում են, որ «ԿՈՆՏԱԿՏ» վճարահաշվարկային համակարգով հաճախորդները չեն կարող գումարները ստանալ տեխնիկական պատճառներով՝ խոստանալով տեխնիկական խնդիրները շուտափույթ շտկել: Այնինչ, դեռևս 2012թ. դեկտեմբերի 25-ից այդ համակարգին տրված թույլտվությունը Կենտրոնական բանկի խորհրդի թիվ 365 Ա որոշմամբ կասեցվել է, և նույն որոշման 2-րդ կետով հանձնարարվել էր նաև բանկերին ձեռնարկել համապատասխան միջոցառումներ այդ մասին հաճախորդներին տեղեկացնելու ուղղությամբ:

Հաճախորդներին իրազեկելու և նրանց սխալ գործողություններից պաշտպանելու նպատակով անհրաժեշտ է անհապաղ բոլոր տեղեկատվական աղբյուրներից և ուղիների միջոցով (բանավոր, թեժ գիծ, ինտերնետային կայք, բուկլետներ, բրոշյուրներ, պաստառներ) հաճախորդներին հաղորդել (տրամադրել) արժանահավատ տեղեկատվություն և իրազեկել նրանց (բանավոր, թեժ գիծ, ինտերնետային կայք) փաստացի փոխանցված գումարների հետվերադարձման տարբերակների և ուղիների մասին:  Հաշվի առնելով այն հանգամանքը, որ «ԿՈՆՏԱԿՏ» համակարգի միջոցով փոխանցումները իրականացվում են նաև հարակից համակարգերի միջոցով, հարկավոր է Ձեր արտասահմանյան գործընկերներին տեղեկացնել այդ համակարգի միջոցով սպասարկում չիրականացնելու վերաբերյալ:

Շնորհակալություն համագործակցության համար:

Սպառողների շահերի և ֆինանսական կրթման կենտրոնի ղեկավար՝ Արմենուհի Մկրտչյան

Սույն գրության հետ կապված կարող եք դիմել
Անժելա Ավետիսյանին