Կենտրոնական բանկ

(Ուղարկվել է CBANet-ով/էլեկտրոնային փոստով 05/03/2014թ.)

Ուղղված է՝ ՀՀ տարածքում գործող բոլոր 
Առևտրային բանկերին 
Վարկային կազմակերպություններին 
Ապահովագրական ընկերություններին

Առարկան՝ Պայմանագրերում (վկայագրերում) պայմաններին (կանոններին) հղում կատարելու վերաբերյալ

Հարգելի՛ տիկնայք և պարոնայք,

Տեղեկացնում ենք Ձեզ, որ վերջին շրջանում ֆինանսական շուկայում միտում է նկատվում, որ ֆինանսական կազմակերպությունների կողմից մատուցվող ծառայությունների պայմանագրերում (վկայագրերում) հղում է կատարվում պայմանագրի անբաժանելի մաս կազմող պայմաններին (կանոններին, սակագներին, այլ ներքին ակտերին) առանց նշելու այդ պայմանների նույնականացման տվյալները:

Նշված խնդիրը առաջացրել է բազմաթիվ բողոքներ հաճախորդների շրջանակներում, ինչպես նաև խնդիրներ են առաջացրել Ֆինանսական համակարգի հաշտարարի կողմից  պահանջների քննության ընթացքում:

Հաշվի առնելով վերը նշվածը, խնդրում ենք Ձեզ, հաճախորդների շահերի պաշտպանության և հետագա խնդիրներից խուսափելու նկատառումներից ելնելով պայմանագրերում պայմաններին հղում կատարելիս պարտադիր նշել այդ պայմանները նույնականացնող ամբողջական տվյալները, մասնավորապես՝ ընդունման ամսաթիվը, նույնականացման համարը, ընդունող մարմնի անվանումը:     

Հորդորում ենք Ձեզ ապահովել նաև հաճախորդների համար վերջիններիս հասանելիությունը, մասնավորապես, եթե պայմանները հրապարակային են, ապա հարկավոր է հղում կատարել համապատասխան աղբյուրին (ինտերնետային էջ/բաժին/ենթաբաժին), եթե պայմանները ոչ հրապարակային են, ապա տրամադրել վավերացված թղթային օրինակը:

Շնորհակալություն համագործակցության համար:

Սպառողների շահերի պաշտպանության և ֆինանսական կրթման կենտրոնի ղեկավար՝ Արմենուհի Մկրտչյան

Սույն գրության հետ կապված հարցերով կարող եք դիմել 
Անժելա Ավետիսյանին