ՀՀ դրամավարկային քաղաքականության ծրագիր (2009թ. 3-րդ եռամսյակ)
(2009/3) 2009 թվականի երկրորդ եռամսյակի փաստացի ցուցանիշները և զարգացումները
2009 թվականի երկրորդ եռամսյակում գնաճի վարքագիծը և դրամավարկային քաղաքականության ուղղությունները պայմանավորող հիմնական գործոնը տնտեսական անկման տեմպերի աճն էր: Չնայած մարտի սկզբին տեղի ունեցած դրամի արժեզրկմանը, միջազգային շուկաներից որոշակի գնաճային ճնշումների փոխանցմանը, ինչպես նաև ապրիլից հիմնական կոմունալ ծառայությունների սակագների բարձրացմանը, կանխատեսվածից ավելի արագ տեմպերով ՀՆԱ անկման պայմաններում, ընդհանուր առմամբ, ձևավորվել է ներքին ցածր գնաճային միջավայր: Ընդ որում, վերոնշյալ գործոնների ազդեցությամբ թեև գնաճի տեմպը նախորդ եռամսյակի համեմատ զգալիորեն աճել է, սակայն մոտ 1 տոկոսային կետով զիջել է կանխատեսվածին` գտնվելով նպատակային միջակայքի ստորին հատվածում:
Վերոնշյալ զարգացումների արդյունքում 2009 թվականի երկրորդ եռամսյակում արձանագրվել է 4.5% գնաճ, որի պարագայում 12-ամսյա գնաճի ցուցանիշը կազմել է 3.6%` նախորդ եռամսյակի նույն ցուցանիշի համեմատ աճելով 2.6 տոկոսային կետով: Ընդ որում, պարենային ապրանքների (ներառյալ ոգելից խմիչք և ծխախոտ) գները եռամսյակի ընթացքում ավելացել են 2.7%-ով (նպաստումը գնաճին` 1.4 տոկոսային կետ), ոչ պարենային ապրանքների գները 7.5%-ով (նպաստումը գնաճին` 1.2 տոկոսային կետ) և ծառայությունների սակագները 6.2%-ով (նպաստումը գնաճին` 1.9 տոկոսային կետ): Եռամսյակի ընթացքում գնաճը հիմնականում պայմանավորվել է մրգի գնի 39.4% (նպաստումը գնաճին` 1.0 տոկոսային կետ), բենզինի գնի 20.5% (նպաստումը գնաճին` 0.5 տոկոսային կետ), դեղամիջոցների գների 16.3% (նպաստումը գնաճին` 0.3 տոկոսային կետ), ինչպես նաև բնակարանային, կոմունալ ծառայությունների սակագների 18.3% (նպաստումը գնաճին` 1.3 տոկոսային կետ) աճով: ØՄիաժամանակ, բնականոն գնաճը 2009 թ. երկրորդ եռամսյակում 2.1% ¿էր, որի պարագայում 12-ամսյա բնականոն գնաճը նախորդ եռամսյակի համեմատ գրեթե չի փոփոխվել` կազմելով շուրջ 3.4%: