Գնաճի հաշվետվություն 2018/1 (Դրամավարկային քաղաքականության ծրագիր 1-ին եռամսյակ 2018թ. Դրամավարկային քաղաքականության 2017թ. 4-րդ եռամսյակի ծրագրի կատարման հաշվետվություն)

2018-02-23

Համառոտագիր

ԿԲ 2018 թ. առաջին եռամսյակի դրամավարկային քաղաքա­կանության ծրագրի համաձայն՝ գնաճն առաջիկա ամիսներին փոքր-ինչ կավելանա՝ տատանվելով թույլատրելի միջակայ­քում, իսկ միջնաժամկետ հատվածում կկայունանա 4% նպատա­կային մակարդակի շուրջ:

12-ամսյա գնաճի նպատակի իրագործմանը հիմնականում նպաս­տելու են կարճաժամկետ հատվածում մակրոտնտեսական միջավայրում սպասվող դրական զարգացումները՝ պայմանա­վոր­ված ԿԲ կողմից իրականացված խթանող դրամավարկային քաղա­քա­կանության դեռևս դրսևորվող ազդեցությամբ և արտաքին ու ՀՀ տնտեսու­թյուններում պահանջարկի վերականգնման ակնկալվող համեմա­տաբար բարձր տեմպերով: 2017 թ. ընթացքում ԿԲ-ն իրա­կանացրել է խթանող դրամավարկային քաղաքականություն՝ նպա­տակաուղղ­ված ներքին պահանջարկի և գնաճի վերականգնմանը, ինչը, ներ­քին պահանջարկի վերականգնման կայունության ամրա­պնդման նպատակով, կպահպանվի նաև 2018 թ. առաջին եռամ­սյակում: 

Այսինքն՝ 2017 թ. չորրորդ եռամսյա­կում ԿԲ-ն գնահատում էր, որ հասարակության կարճաժամկետ գնաճային սպասումները 2018 թ. սկզբին որոշակիորեն կմեղմվեն, քանի որ պայմանա­վոր­ված են հիմնականում առաջարկի գործոններով: Ինչպես և սպաս­վում էր, 2018 թ. առաջին եռամսյակում լրացուցիչ գնաճային սպա­սումները մեղմվել են, ուստի քաղաքա­կանության ավելի արագ արձագանքման անհրաժեշտություն դեռևս չկա: Այդուհանդերձ, մակրոտնտեսական նախանշված զար­գացումների ներքո և գնաճի նպատակի իրագործման համար միջնաժամկետ հատվածում ան­հրա­ժեշտ կլինի դրամավարկային խթանող պայ­մանների աստի­ճանական չեզոքացում: 

Ելնելով 2017 թվականի չորրորդ եռամսյակում շարունակվող բարձր տնտեսական ակտիվությունից՝ ԿԲ-ն, նախկին կանխա­տեսման համեմատ, գնահատում է 2017 թվականի տնտեսական աճի ավելի բարձր ցուցանիշ: Նախորդ կանխատես­ման համե­մատ ակնկալվում է նաև համախառն պահանջարկի ավելի բարձր մակարդակ, ինչը հիմնավորվում է թե՛ բնականոն գնաճի և թե՛ ներմուծման բարձր աճով: Ակնկալվում է, որ կանխա­տեսվող հորիզոնում տնտեսական աճի արագացումը պայմանա­վորող ժամա­նակավոր գործոնները աստիճանաբար կվերանան և այն կգտնվի իր ներուժային մա­կարդակի շուրջ:

Կարճաժամկետ հատվածում գնաճի և տնտեսական աճի կան­խատեսումների ռիսկերը հիմնականում երկկողմանի են՝ պայմանա­վորված գյուղատնտեսության ճյուղի հնարավոր զարգացումներով:

Միջնաժամկետ հատվածում գնաճի և տնտեսական աճի ռիս­կերը հիմնականում վերևի ուղղությամբ են: Դրանք պայմանա­վորված կլինեն արտաքին պահանջարկի ավելի արագ վերա­կանգնմամբ, հումքային և պարենային ապրանքների միջազգային շուկաներում գների՝ նախորդ կանխատեսումների համեմատ արագ աճով և ներքին պահանջարկի, հատկա­պես սպառման աճի, առավել երկարատև բնույթով: