Կենտրոնական բանկ

Հայտարարություն

ՀՀ Կենտրոնական բանկի կողմից կիրառված պատասխանատվության միջոցի վերաբերյալ

Թույլ տրված խախտումը

Գործող իրավակարգավորումների համաձայն՝ Բանկերը և այլ ֆինանսական կազմակերպությունները, որոնք ՀՀ կենտրոնական բանկի (այսուհետ՝ Կենտրոնական Բանկ) կողմից տրված լիցենզիայի համաձայն իրավասու են մատուցելու վճարահաշվարկային ծառայություններ, կարող են արտասահմանյան վճարահաշվարկային համակարգերի հետ համագործակցել հայաստանյան վճարահաշվարկային համակարգի միջոցով՝ Կենտրոնական բանկի թույլտվությամբ:

Վերոգրյալի ներքո Կենտրոնական Բանկն իր կողմից իրականացվող վերահսկողության շրջանակներում պարզել է, որ «Ֆասթ Շիֆթ» ՍՊԸ վճարահաշվարկային կազմակերպությունը (այսուհետ՝ Կազմակերպություն) (լիցենզիա թիվ 24, հասցե՝ ՀՀ, ք. Երևան, Նորք Մարաշ, Գ․ Հովսեփյան փողոց 32/6) համագործակցել է արտասահմանյան վճարահաշվարակային համակարգի հետ՝ առանց Կենտրոնական բանկի թույլտվության:

Խախտման համար կիրառված պատասխանատվության միջոցը

Խախտումը թույլ տալու համար Կազմակերպության նկատմամբ կիրառվել է նախազգուշացում՝ խախտումը մեկամսյա ժամկետում վերացնելու և ձեռնարկված միջոցառումների մասին 10-օրյա ժամկետում Կենտրոնական բանկ տեղեկատվություն ներկայացնելու հանձնարարականով:

Տեղեկատվություն պատասխանատվության միջոցի կիրառման որոշման օրվա դրությամբ խախտումը վերացված լինելու վերաբերյալ

Պատասխանատվության միջոց կիրառելու որոշման պահին Կենտրոնական բանկի կողմից արձանագրված խախտումը վերացված չէ:

Պատասխանատվության միջոցի կիրառման որոշման ամսաթիվը

07/07/2026