Կենտրոնական բանկ

Կայացավ Ֆինանսական կրթման ծրագրի հանձնաժողովի 30-րդ նիստը

Ֆինանսական կրթման ծրագրի մշակման և իրականացման հանձնաժողովը ունի նոր նախագահ՝ ԿԲ խորհրդի անդամ Արմեն Քթոյանը։

Հանձնաժողովի առաջին նիստը Արմեն Քթոյանի նախագահությամբ կայացավ առցանց ձևաչափով՝ միավորելով պետական կառույցների, նախարարությունների, ֆինանսական համակարգի ներկայացուցիչների, ինչպես նաև հասարակական կազմակերպությունների և ոլորտի այլ գործընկերների։

Հանձնաժողովի նախագահն իր ողջույնի խոսքում ընդգծեց, որ 2026 թվականը ֆինանսական կրթման ծրագրի համար առանցքային և անցումային տարի է, քանի որ մեկնարկում է ծրագրի նոր՝ 2027–2031թթ. փուլի ձևավորման գործընթացը։ ԿԳՄՍ նախարարության նախարարի տեղակալ, ՖԿԾ Հանձնաժողովի համանախագահ Արաքսյա Սվաջյանն իր հերթին ընդգծեց, որ ֆինանսական կրթության զարգացումը կարևոր է ոչ միայն աշակերտների և երիտասարդների, այլ նաև մեծահասակների համար՝ կարևորելով կյանքի բոլոր փուլերում ֆինանսական գիտելիքների և հմտությունների շարունակական զարգացումը։

2026 թվականի հիմնական շեշտադրումները

• ֆինանսական կրթման ծրագրի թարմացում և նոր 5-ամյա փուլի մշակում,
• առավել թիրախավորված, խնդրակենտրոն մոտեցումների կիրառում,
• ֆինանսական կրթության էկոհամակարգի զարգացմանն ուղղված նախաձեռնությունների շարունակական իրականացում,
• առցանց կրթության և իրազեկման շարունակական ապահովում՝ ABCFINANCE.am հարթակի միջոցով,
• միջազգային համագործակցության ընդլայնում, այդ թվում՝ OECD, ԵԱՏՄ և Alliance for Financial Inclusion շրջանակներում,
• 2026 թվականին Հայաստանում նախատեսվող միջազգային այցեր և համագործակցային միջոցառումներ։

Ամփոփվեցին նաև 2026թ. առաջին եռամսյակի արդյունքները

Նիստի ընթացքում ներկայացվեցին տարվա առաջին եռամսյակում իրականացված ֆինանսական կրթման նախաձեռնությունները։ Ելույթներով հանդես եկան Կենտրոնական բանկի, Ֆինանսական համակարգի հաշտարարի գրասենյակի, DSIK-ի և Ավանդների հատուցումը երաշխավորող հիմնադրամի ներկայացուցիչները։

Առաջին եռամսյակը եղել է ակտիվ և հագեցած․

• ~5,500 անմիջական մասնակից՝ միջոցառումներին
• 1,900,000 դիտում՝ սոցիալական ցանցերում
• 12 ֆինանսական կրթման ծրագրեր և միջոցառումներ
• ~20,000 անուղղակի ներգրավված մասնակից
• ~500,000 առցանց լսարան
• 2 նոր ներգրավման նախաձեռնություն
• 1 միջազգային փորձի փոխանակման նախաձեռնություն

Հաջորդ քայլերը

Առաջիկայում հանձնաժողովը շարունակելու է ակտիվ համագործակցությունը՝ ապահովելու համար, որ 2027–2031թթ. Ֆինանսական կրթման ծրագրի նոր փուլը ձևավորվի որպես թիրախակենտրոն, արդյունավետ և ժամանակակից ռազմավարություն, որը կարտացոլի շահառուների իրական կարիքները և միջազգային լավագույն փորձը։