Կենտրոնական բանկ

ԱՊՀ անդամ երկրների արժեթղթերի շուկաները կարգավորող պետական մարմինների ղեկավարների խորհուրդը սկսեց իր աշխատանքը

Այսօր Ծաղկաձորում իր աշխատանքը սկսեց ԱՊՀ անդամ երկրների արժեթղթերի շուկաները կարգավորող պետական մարմինների ղեկավարների խորհուրդը: Ողջունելով նիստի մասնակիցներին, ԱՊՀ անդամ երկրների արժեթղթերի շուկաները կարգավորող պետական մարմինների ղեկավարների խորհուրդը նախագահող ՀՀ կենտրոնական բանկի նախագահ Արթուր Ջավադյանը, մասնավորապես, ասաց.

«Ուրախ եմ ձեզ ողջունել Ծաղկաձոր քաղաքում:

Քանի որ այսօր հոբելյանական նիստ է, տեղին է մտաբերել խորհուրդը ստեղծելու մտահղացումը:

Խորհուրդը իր գործունեությունը սկսել է պարբերաբար իրականացնել 2003 թվականից: Նրա հիմնական խնդիրն է ԱՊՀ անդամ երկրների արժեթղթերի շուկաների կարգավորման դաշտում աշխատանքներ տանող պետական մարմինների ղեկավարների, մասնագետների միջև կապերի զարգացումը, այդ ոլորտում կուտակված փորձի  և առաջավոր գաղափարների անարգել փոխանակման համար համապատասխան պայմանների ստեղծումը, արժեթղթերի շուկայի մասնակիցների նկատմամբ վերահսկողություն իրականացնելու բնագավառում քաղաքականության բարելավմանն ուղղված առաջարկությունների մշակումը, կարգավորում իրականացնելիս համանման սկզբունքների կիրառումը, այդ թվում՝ նորմատիվաիրավական դաշտի ձևավորումը:

Թույլ տվեք հակիրճ բնութագրել Հայաստանի արժեթղթերի շուկայի ներկա վիճակը:

• Ինչպես ձեզ հայտնի է, Հայաստանը իրականացնում է կենսաթոշակային բարեփոխում: Մենք մտադիր ենք 2011 թվականից անցնել կենսաթոշակների երկմակարդակ համակարգի: Այս համատեքստում կուզենայի նշել, որ մենք բավականին լրջորեն ենք վերաբերվում բարեփոխման սոցիալական բաղադրիչին և չենք անտեսում նաև դրա մեծ, օժանդակող դերակատարությունը արժեթղթերի շուկայի զարգացման գործում: Այս պահին մշակման փուլում են գտնվում Ներդրումային հիմնադրամների մասին ՀՀ օրենքը և Կուտակային կենսաթոշակների մասին ՀՀ օրենքը, որոնց շրջանակներում կարգավորման կենթարկվի ներդրումային և կենսաթոշակային հիմնադրամների գործունեությունը: Համապատասխան օրենսդրական ձեռնարկների արդյունքում մեր ֆինանսական շուկայում ի հայտ կգան ներդրումային հիմնադրամներ և իրենց գործունեությունը կծավալեն ֆոնդերի կառավարիչները: Հուսով ենք, որ զարգացում կապրի նաև կյանքի ապահովագրության ոլորտը: Հույս հայտնենք, որ բարեփոխման արդյունքում մեր ֆինանսական շուկան նոր մասնակիցների համար կդառնա ավելի գրավիչ: Այս համատեքստում մեզ համար նույնպես բացվում է համաշխարհային մասշտաբով նոր ֆինանսական շուկաներ դուրս գալու հնարավորություն:
• Քաջ հայտնի է, որ ՀՀ կենտրոնական բանկը և ՆԱՍԴԱՔ Օ Էմ Էքս-ը դեռևս 2008 թվականի սկզբից համագործակցում են՝ ձեռնարկելով արժեթղթերի շուկայի զարգացմանն ուղղված միջոցառումներ.
• Ներկա պահի դրությամբ ժամանակավոր հարկային արտոնություններ են նախաձեռնվել բաժնետոմսերի առաջնային հանրային առաջարկ անցկացնելու և բորսայում ցուցակում անցած թողարկողների արժեթղթերի ցուցակում կազմակերպելու համար: Հանրային բաժնետոմսեր թողարկողների համար շահութահարկի դրույքը իջեցվում է մինչև 50 տոկոս: Ընկերությունները նաև ազատվում են բորսայում ցուցակման դնելու նպատակով ընկերությանը նախապատրաստելու հետ կապված խորհրդատվական, մարքեթինգային և իրավաբանական ծառայությունների ավելացված արժեքի հարկից:
• Հետագայում պետական սեփականության մասնավորեցումը Հայաստանում կիրականացվի ՆԱՍԴԱՔ Օ Էմ Էքս Հայաստան ֆոնդային բորսայի միջոցով: Ներկայումս այս ուղղությամբ տարվում են համապատասխան աշխատանքներ: Այսպես, մոտակա ամիսներին թվով հինգ պետական ընկերություն բորսայի միջոցով կվերածվի մասնավորի:

Ի մի բերելով ասվածը, կուզենայի ընդգծել, որ առաջիկա տարում ևս մենք մտադիր ենք շարունակել 2007 թվականից մեկնարկած բարեփոխումները, որոնք ուղղված են կապիտալի շուկայի զարգացմանը, և լիահույս ենք, որ մեր գործը հաջողությամբ է պսակվելու: Այս ուղղությամբ ծավալվող գործունեությունը ներառում է շուկայի մասնակիցներին (թողարկողներ, ներդրողներ և մասնագիտացված անձինք) սովորեցնելու գործընթացը, ինստիտուցիոնալ ներդրողների (ներդրումային և կենսաթոշակային հիմնադրամներ) ձևավորումը, տեղեկությունների բացահայտման արդյունավետ մեխանիզմների մշակումը:

Համոզված եմ, որ խորհրդի հաջորդ նիստերի ընթացքում ևս մեզ կհաջողվի ընդունել այնպիսի փոխշահավետ որոշումներ, որոնք կնպաստեն մեր երկրներում արժեթղթերի շուկայի հետագա զարգացմանը: Եվ, կարծում եմ, նման նպատակի հասնելը կախված է մեր ընդհանուր ջանքերից:

Օգտվելով առիթից, ցանկանում եմ շնորհակալություն հայտնել խորհրդին, որ ինձ պատիվ է արվել այս տարի նախագահել նիստերը: Հուսով եմ, որ մեզ հաջողվել է մեր համեստ ավանդը ներդնել ընդհանուր գործին:

Վերջում, թույլ տվեք ինձ, որպես ԱՊՀ անդամ երկրների արժեթղթերի շուկաների կարգավորման պետական մարմինների ղեկավարների խորհրդի 10-րդ նիստի նախագահի, շնորհավորել մեզ բոլորին հոբելյանի կապակցությամբ, մաղթել հաջողություններ և հայտարարել խորհրդի 10-րդ հոբելյանական նիստը բացված»: