Կենտրոնական բանկ

Մասնագիտացված անձանց մոտ առաջացել են մի շարք խնդիրներ՝ կապված ընթացիկ հաշվետվությունների որոշ ձևերի լրացման հետ: Այս առնչությամբ հայտնում ենք հետևյալը.

1. Մասնագիտացված անձանց հաշվետվությունների 66.4-1ԲԳ/ԴԳ/ՀԿԳ ձևի «Գործարքը նույնականացնող համարը» սյունակում արտացոլվում է գործարքի կնքման համար հիմք հանդիսացած հիմնական պայմանագրի տարբերակիչ համարը կամ պայմանագրի ներքին հաշվառման համարը: Մասնավորապես, եթե հիմնական պայմանագրի կնքումից հետո կնքվում է լրացուցիչ համաձայնագիր կամ այնպիսի նոր պայմանագիր, որն ընդամենը ենթադրում է տվյալ ռեպո գործարքի պայմանների փոփոխություն (օրինակ՝ ժամկետի երկարաձգում), ապա այս սյունակում արտացոլվում է հիմնական պայմանագրի տարբերակիչ համարը կամ պայմանագրի ներքին հաշվառման համարը: Ընդ որում «գործարքի կնքման ամսաթիվ» դաշտում այս պարագայում լրացվում է փոփոխության (լրացման) կատարման (ուժի մեջ մտնելու) ամսաթիվը, իսկ «գործարքի ժամկետը (օր)» դաշտում՝ փոփոխության կատարման (ուժի մեջ մտնելու) օրվանից մինչև գործարքի ավարտը մնացած օրերի թիվը:
2. Մասնագիտացված անձանց հաշվետվությունների 66.4-1ԲԳ/ԴԳ/ՀԿԳ ձևի «Տոկոսադրույքը» սյունակում լրացվում է պայմանագրում նշված տարեկան տոկոսադրույքը:
3. Մասնագիտացված անձանց հաշվետվությունների 66.4-1ԲԳ/ԴԳ ձևում ռեպո և հակադարձ ռեպո գործարքների մասով պետք է արտացոլել միայն հետևյալ տեղեկատվությունը՝
   1) հիմնական պայմանագրերի գործարքները.
   2) գործարքների երկարաձգումները.
   3) եթե մեծացել է նախկինում կնքված գործարքի առարկա արժեթղթերի ծավալը, ապա ցույց է տրվում միայն այդ ավելացված մասը:
4. Հավատարմագրային կառավարման գործունեության շրջանակներում կնքված ռեպո գործարքները չեն արտացոլվում 66.4-1ԲԳ/ԴԳ ձևում:

Ֆինանսական համակարգի քաղաքականության ու վերլուծությունների վարչության պետ՝ Դավիթ Սարգսյան

Ֆինանսական համակարգի քաղաքականության ու վերլուծությունների վարչություն
Զառա Ալեքսանյան