Կենտրոնական բանկ

Հարգելի՛ պարոնայք,

Ինչպես Ձեզ հայտնի է, ՀՀ օրենսդրությամբ բանկը չի կարող պարտադրել հաճախորդին վճարումը կատարել կամ ընդունել Հայաստանի Հանրապետության դրամով, եթե փոխանցումը կատարվում է արտարժույթով: Ինչպես նաև արտարժույթով ավանդ ներդնելու և վարկ ստանալու դեպքերում բանկը չի կարող ստիպել հաճախորդին դրանք ստանալու (ներդնելու) Հայաստանի Հանրապետության դրամով:

Սակայն հաշվի առնելով այն հանգամանքը, որ ներկայումս Հայաստանի Հանրապետության տարածքում ձեռնարկվում են համալիր միջոցառումներ, որոնց նպատակն է բարձրացնել վստահությունը հայկական դրամի նկատմամբ, որի հետևանքով հայկական դրամը կդառնա կանխիկ վճարումների իրականացման հիմնական միջոցը, առաջարկում ենք դրամական (փողային) փոխանցումներ իրականացնելիս կիրառել նաև հետևյալ մեխանիզմը.

Այն դեպքում, երբ հաճախորդը նախընտրում է իրեն փոխանցված գումարը և իրեն տրամադրվող վարկը ստանալ, իսկ ավանդը ներդնել արտարժույթով, բանկի կողմից հաճախորդի ստորագրմանը պետք է ներկայացվի համապատասխան փաստաթուղթ, որի ձևը կից ներկայացնում ենք, և որով հաճախորդը կհավաստի, որ ինքը նախընտրում է իրեն փոխանցվող գումարը, իրեն տրամադրվող վարկը ստանալ, իսկ ավանդը ներդնել արտարժույթով:

Հաշվի առնելով վերոգրյալը, առաջարկում ենք Ձեզ հաճախորդների հետ հարաբերություններում կիրառել կից ներկայացվող ձևը, հետագայում արտարժույթով գումարի ստացումը (ներդրումը) նախընտրելու դեպքերի վերաբերյալ վերլուծություն կատարելու նպատակով:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԿԵՆՏՐՈՆԱԿԱՆ ԲԱՆԿԻ ՆԱԽԱԳԱՀ ՝   ՏԻԳՐԱՆ ՍԱՐԳՍՅԱՆ 

Սույն գրության վերաբերյալ լրացուցիչ պարզաբանումներ ստանալու համար կարող եք դիմել
Հայաստանի Հանրապետության Կենտրոնական բանկի Իրավաբանական վարչության Ֆինանսական համակարգի վերահսկողության իրավական սպասարկման 2-րդ բաժնի պետ Վազգեն Մնացականյանին