Կենտրոնական բանկ

Ուղղված է՝ ՀՀ տարածքում գործող բանկերին

Առարկան՝ Ներդրումային ծառայությունների մատուցման մասին ՀՀ Կենտրոնական բանկին պարտադիր տեղեկացնելու վերաբերյալ

Տեղեկացնում ենք, որ սույն թվականի փետրվարի 29-ից բանկերին արգելվում է Հայաստանի Հանրապետության տարածքում ցանկացած տեսակի արժեթղթերով մատուցել ներդրումային ծառայություններ (հաճախորդներից արժեթղթերով գործարքների կատարման հանձնարարականների ընդունում և հաղորդում, իր կամ  հաճախորդի անունից և հաճախորդի հաշվին արժեթղթերով գործարքների կատարում, արժեթղթերում ներդրումների հետ կապված խորհրդատվության տրամադրում հաճախորդներին,  իր հաշվին և իր անունից արժեթղթերով գործարքների կատարում, արժեթղթերի փաթեթի կառավարում, արժեթղթերի երաշխավորված կամ չերաշխավորված տեղաբաշխման իրականացում)` առանց ՀՀ կենտրոնական բանկ «Արժեթղթերի շուկայի մասին» ՀՀ օրենքի 35-րդ հոդվածով նախատեսված տեղեկացման ներկայացման, ինչպես նաև ոչ հիմնական ծառայություն համարվող արժեթղթերի պահառության ծառայությունը, եթե տվյալ բանկը չի հանդիսանում ներդրումային ծառայություններ մատուցող անձ:

Ընդ որում, թվարկված սահմանափակումները տարածվում են նաև պետական արժեթղթերի շուկայում ներդրումային և/կամ պետական արժեթղթերի պահառության ծառայություններ մատուցող այն բանկերի վրա, որոնք հանդիսանում են Հայաստանի Հանրապետության պետական պարտատոմսերի շուկայում գործակալ կամ դիլեր:

Ելնելով վերը նշվածից՝ առաջարկում ենք հնարավորինս սեղմ ժամկետներում համապատասխանեցնել ներդրումային  ծառայությունների, ինչպես նաև ոչ հիմնական ծառայություն համարվող արժեթղթերի պահառության ծառայության մատուցումը «Արժեթղթերի շուկայի մասին» ՀՀ օրենքով սահմանված պահանջներին և ՀՀ կենտրոնական բանկ ներկայացնել «Արժեթղթերի շուկայի մասին» ՀՀ օրենքի 35-րդ հոդվածի 2-րդ մասով նախատեսված տեղեկացումը` կից ներկայացնելով նաև հետևյալը.

• ներդրումային ծառայությունների մատուցման համար նախատեսված պատասխանատու ստորաբաժանման մասին տեղեկատվությունը, մասնավորապես` ստորաբաժանման կառուցվածքը և գործառույթները, ստորաբաժանման ղեկավարի և ներդրումային ծառայություններ մատուցող աշխատակիցների ինքնության, ինչպես նաև այդ աշխատակիցների այս կամ այն ներդրումային ծառայության մատուցման հետ կապված  պարտականությունների վերաբերյալ տվյալները.
• «Արժեթղթերի շուկայի մասին» ՀՀ օրենքի 59-րդ հոդվածով սահմանված գործունեության կանոնները.
• ներդրումային առաջարկությունների կազմման և տարածման հետ կապված շահերի բախումները կանխելու համար «Արժեթղթերի շուկայի մասին» ՀՀ օրենքի 63-րդ հոդվածի 1-ին մասի 5-րդ կետի համաձայն ներդրված կազմակերպական և կառավարչական միջոցների վերաբերյալ տեղեկատվությունը.
• ծառայողական տեղեկատվության պատշաճ պահպանման համար «Արժեթղթերի շուկայի մասին» ՀՀ օրենքի 99-րդ հոդվածի համաձայն ձեռնարկված տեխնիկական բնույթի միջոցների վերաբերյալ տեղեկատվությունը և կազմակերպչական կանոնները.
• Բանկի՝ որպես ենթապահառուի կողմից Կենտրոնական դեպոզիտարիայի հետ կնքված պայմանագրի պատճենը (եթե բանկը նախատեսում է իրականացնել կամ իրականացնում է արժեթղթերի պահառություն).
• հաշվառումն ապահովող տեխնիկական ու ծրագրային միջոցների մասին տեղեկատվություն և թե ինչպես է իրականացվում «Արժեթղթերի շուկայի մասին» ՀՀ օրենքի 67-րդ հոդվածի համաձայն ներդրումային ծառայություններից օգտվող անձանց միջոցների առանձնացված հաշվառման վարումը:
• գրանցումների վարումն ապահովող տեխնիկական ու ծրագրային միջոցների մասին տեղեկատվություն և թե ինչպես է իրականացվում «Արժեթղթերի շուկայի մասին» ՀՀ օրենքի 69-րդ հոդվածի համաձայն ստացված և կատարված հանձնարարականների վերաբերյալ գրանցումների վարումը:

Ֆինանսական վերահսկողության վարչության պետ՝ Հրանտ Սուվարյան

Սույն գրության հետ կապված հարցերով կարող եք դիմել
Ֆինանսական վերահսկողության վարչություն
Էլեն Զարգարյանին