«Լավագույն գրքույկ» մրցույթի վերաբերյալ
ՀՀ տարածքում գործող
- Բանկերի միությանը,
- Ապահովագրական ընկերությունների ասոցիացիային,
- Բոլոր վարկային կազմակերպություններին
«Լավագույն գրքույկ» մրցույթի վերաբերյալ
Հարգելի՛ տիկնայք և պարոնայք,
Տեղեկացնում ենք Ձեզ, որ Կենտրոնական բանկի կողմից պարբերաբար ուսումնասիրություններ են անցկացվում բանկերի, վարկային կազմակերպությունների և ապահովագրական ընկերությունների գլխամասային գրասենյակներում ու մասնաճյուղերում պարզելու համար, թե նշյալ կազմակերպությունների կողմից մատուցվող ծառայությունների մասին տեղեկատվությունը որքանո՞վ է հասանելի և մատչելի հաճախորդների համար: Հատուկ ուշադրություն է դարձվում հատկապես հրապարակվող գրքույկների (բրոշյուրների) վրա: Այս ոլորտում Ձեր աշխատանքները խրախուսելու նպատակով հերթական անգամ Կենտրոնական բանկը որոշել է մրցանակ սահմանել լավագույն գրքույկը թողարկած բանկի, վարկային կազմակերպության և ապահովագրական ընկերության համար: Այդ նպատակով Կենտրոնական բանկում ձևավորվելու է մրցութային հանձնաժողով, որը ուսումնասիրելու է Ձեր կողմից թողարկված բոլոր գրքույկները և մի շարք չափանիշների հիման վրա ընտրելու է 3 լավագույն գրքույկներ առանձին բանկերի, վարկային կազմակերպությունների և ապահովագրական ընկերությունների համար: Ուսումնասիրությունները կսկսվեն իրականացվել ս/թ մայիսին և հուլիս ամսին էլ դրա արդյունքները կամփոփվեն: Լավագույն գրքույկը ճանաչվելու է հետևյալ 4 չափանիշների հիման վրա.
- Գրքույկի դիզայնը. պատրաստված լինի որակյալ թղթից, ունենա գրավիչ տեսք, աչքի ընկնի համահունչ գունային համադրություններով և համապատասխան գունագեղ պատկերներով:
- Տեղեկատվության մատուցման ձևը. պարունակի հեշտ ընթեռնելի տառաչափերով, հասկանալի և մատչելի ձևով տպագրված տեղեկատվություն, պարունակի վերնագրեր, առանձին բացատրական նշումներ, սպառողին հնարավորինս ծանոթ բառեր և այլն:
- Տեղեկատվության բովանդակությունը և սահմանված պահանջներին դրա համապատասխանությունը. գրքույկում պարունակվող տեղեկատվությունը պետք է բավարարի օրենսդրությամբ սահմանված պահանջներին:
- Գրքույկի հասանելիությունը. գրքույկը պետք է սպառողի համար լինի ամբողջությամբ հասանելի: Այն պետք է տեղադրված լինի բանկի, վարկային կազմակերպության և ապահովագրական ընկերության տարածքային այն մասերում, որ սպառողի համար լինի հեշտ հասանելի և ցուցադրված լինի այնպես, որ սպառողը կարողանա հեշտությամբ այն տեսնել և ձեռք բերել: Այստեղ հատուկ ուշադրություն է դարձվելու նաև թողարկված գրքույկների տպաքանկի վրա:
Հայտնում ենք նաև, որ մրցանակաբաշխությունը տեղի է ունենալու Կենտրոնական բանկում և լայնորեն լուսաբանվելու է լրատվամիջոցներով: Հաղթող բանկին, վարկային կազմակերպությանը և ապահովագրական ընկերությանը շնորհվելու են համապատասխան վկայագրեր:
Շնորհակալություն համագործակցության համար:
Հարգանքներով՝
Ֆինանսական համակարգի քաղաքականության և վերլուծությունների վարչության պետ՝ Վահե Վարդանյան
Ֆինանսական համակարգի քաղաքականության և վերլուծությունների վարչություն
կատարող` Անժելա Ավետիսյան