Կենտրոնական բանկ

Ուղղված է՝ ՀՀ տարածքում գործող բոլոր 
Գրավատներին

Առարկան՝ Գրավատների հաճախորդների վարկերի հետ կապված վճարումները երրորդ անձանց կողմից կատարելու վերաբերյալ

Հարգելի՛ տիկնայք և պարոնայք,

Կենտրոնական բանկը պարբերաբար ստանում է ազդակներ առ այն, որ հաճախ գրավատները պահանջում են, որպեսզի իրենց հետ վարկային պայմանագիր կնքած անձի (այսուհետ` Վարկառու) վարկի հետ կապված յուրաքանչյուր վճարում (այսուհետ` Վճարում) կատարի միայն Վարկառուն:

Որոշ դեպքերում գրավատները Վարկառուի փոխարեն Վճարում կատարող անձանցից (այսուհետ` Երրորդ անձինք) նույնիսկ պահանջում են նոտարական վավերացմամբ լիազորագիր` տրված Վարկառուի կողմից:

Միևնույն ժամանակ, մի շարք դեպքերում գրավատները Երրորդ անձանցից ընդունում են հաշվարկված տոկոսագումարների և տույժերի Վճարումներ, սակայն հրաժարվում են վարկերի մայր գումարի մարման նպատակով կատարվող Վճարումներ ընդունելուց:

Տեղեկացնում ենք, որ օրենսդրությամբ գրավատներին չի արգելվում Վարկառուի փոխարեն ցանկացած Վճարում ընդունել նաև Երրորդ անձանցից: Ընդ որում, Երրորդ անձանց կողմից Վճարումներ կարող են կատարվել ընդհուպ մինչև Վարկառուի վարկի ամբողջական մարումը, որի դեպքում գրավադրված գույքը կարող է պահպանվել գրավատան կողմից մինչև գրավատուի կամ վերջինիս կողմից պատշաճ կերպով լիազորված անձի ներկայանալը:

Ելնելով վերոգրյալից հայտնում ենք, որ Երրորդ անձանց կողմից Վճարումների իրականացումը չի հակասում օրենսդրությամբ սահմանված պահանջներին, և Վարկառուների պարտավորությունների կատարման նպատակով Վճարումներ կարելի է ընդունել նաև Երրորդ անձանցից:

Շնորհակալություն համագործակցության համար:

Սպառողների շահերի պաշտպանության և ֆինանսական կրթման կենտրոնի ղեկավար՝ Արմենուհի Մկրտչյան

Սույն գրության հետ կապված հարցերով կարող եք դիմել Գրիգոր Աբաջյանին