Կենտրոնական բանկ

Ուղղված է՝ ՀՀ տարածքում գործող բոլոր
Բանկերին
Վարկային կազմակերպություններին

Առարկան՝ Ոսկու գրավով վարկերի վաղաժամկետ մարման դեպքում գրավի վերադարձման հետ կապված

Հարգելի՛ տիկնայք և պարոնայք,

Հայաստանի Հանրապետության կենտրոնական բանկը ստանում է բազմաթիվ ազդակներ թե՛ սպառողներից և թե՛ ֆինանսական կազմակերպություններից այն մասին, որ ոսկու գրավով վարկերի վաղաժամկետ մարման դեպքում գրավի վերադարձը անհարկի ձգձգվում է, իսկ մի շարք դեպքերում էլ ֆինանսական կազմակերպությունների անգործության և բավարար ջանք չգործադրելու պատճառով գրավադրված գույքի վերադարձը նույնիսկ գերազանցում է 1 օրը:

Գրավառուների նման գործելաոճը ոչ միայն չի բխում Հայաստանի Հանրապետության քաղաքացիական օրենսգրքի պահանջներից, այլ նաև խաթարում է ֆինանսական կազմակերպությունների միջև առկա մրցակցությունը` ստեղծելով ելքի արհեստական արգելքներ (գրավատուները չեն կարողանում հեշտությամբ գրավը տեղափոխել այլ վարկատու կազմակերպություն առավել բարենպաստ պայմաններով վարկ վերցնելու համար):

Հայտնում ենք, որ Հայաստանի Հանրապետության քաղաքացիական օրենսգրքի 247-րդ հոդվածի 1-ին մասի 1-ին կետի համաձայն՝ գրավը դադարում է գրավով ապահովված պարտավորությունը դադարելով, իսկ համաձայն նույն հոդվածի 2-րդ մասի՝ գրավով ապահովված պարտավորության կատարման հետևանքով գրավը դադարելու դեպքում գրավառուն, որի մոտ գտնվել է գրավ դրված գույքը, պարտավոր է այն անհապաղ վերադարձնել գրավատուին:

Հաշվի առնելով վերոնշյալը՝ Ձեզ անհրաժեշտ է ոսկու գրավով վարկերի մարման դեպքում (նաև՝ վաղաժամկետ մարման) ապահովել բոլոր անհրաժեշտ մեխանիզմները և գործադրել հնարավոր բոլոր ջանքերը կարճ ժամկետում` առանց անհարկի ձգձգումների,  գրավը հաճախորդին վերադարձնելու համար:

Տեղեկացնում ենք, որ Կենտրոնական բանկը ուշադրության կենտրոնում է պահելու այս խնդիրը և ֆինանսական կազմակերպությունների կողմից նման չարաշահումներ նկատելու դեպքում կիրառելու է խիստ վերահսկողական միջոցառումներ:

Շնորհակալություն համագործակցության համար:

Սպառողների շահերի պաշտպանության և ֆինանսական կենտրոնի ղեկավար՝ Արմենուհի Մկրտչյան

Սույն գրության հետ կապված հարցերով կարող եք դիմել Գրիգոր Աբաջյանին