Կենտրոնական բանկ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ 
ԿԵՆՏՐՈՆԱԿԱՆ ԲԱՆԿ

ՖԻՆԱՆՍԱԿԱՆ ՎԵՐԱՀՍԿՈՂՈՒԹՅԱՆ ԵՎ ԼԻՑԵՆԶԱՎՈՐՄԱՆ ԴԵՊԱՐՏԱՄԵՆՏ

05/03/2020թ.

ՀՀ տարածքում գործող առևտրային բանկերին 

Հայաստանի Հանրապետության Կենտրոնական բանկին հայտնի տեղեկատվության համաձայն, ՀՀ տարածքում գործող որոշ առևտրային բանկեր (այսուհետ՝ Բանկեր) իրականացնում են ՀՀ տարածքում գործող վճարահաշվարկային կազմակերպությունների հետ համագործակցություն՝ Բանկերի մասնաճյուղերի/գլխամասերի տարածքներում տեղադրելով վճարահաշվարկային կազմակերպությանը պատկանող վճարային տերմինալներ: Ընդ որում համագործակցության շրջանակներում ծառայությունը փաստացի մատուցվում է վճարահաշվարկային կազմակերպության կողմից, իսկ իրականացված վճարումներից գանձվող միջնորդավճարներից Բանկերը ևս ստանում են եկամուտ: Դեռ ավելին՝ առկա են դեպքեր երբ տեղադրված վճարային տերմինալները կրում են Բանկի տարբերանշանները, ինչը կարող է ապակողմնորոշել հաճախորդներին:

Ուսումնասիրելով ներկայացված ծառայությունների առանձնահատկությունները, կենտրոնական բանկը հանգել է այն եզրակացության, որ այն Բանկերը, որոնք մատուցում են կամ նախատեսում են մատուցել վերը նշած ծառայությունները, անհրաժեշտ է ստանան «Բանկերի և բանկային գործունեության մասին» ՀՀ օրենքի 34-րդ հոդվածի 2-րդ մասով սահմանված Հայաստանի Հանրապետության կենտրոնական բանկի կողմից տրվող թույլտվությունը:

Թույլտվությունը ստացած Բանկը, տվյալ տեսակի համագործակցությունը իրականացնելիս պետք է առնվազն պահպանի հետևյալ պայմանները՝

• Վճարային տերմինալի ինտերֆեյսում կամ հաճախորդի համար հասանելի և տեսանելի այլ վայրում հստակ պետք է նշում կատարվի վճարային տերմինալների միջոցով կատարվող վճարումներից գանձվող միջնորդավճարների վերաբերյալ, ինչպես նաև հստակ պետք է նշված լինի, որ ծառայությունը մատուցվում է տվյալ վճարահաշվարկային կազմակերպության կողմից:
•  Կողմերի միջև կնքված պայմանագրով հստակ պետք է կարգավորված լինի, որ հօգուտ բանկի կատարված վճարումներն իրականացվում են իրական ռեժիմով (օր.՝ վարկը մարվում է վճարման պահին):

Ֆինանսական վերահսկողության և լիցենզավորման դեպարտամենտի տնօրեն ՝   Դանիել Ազատյան

Կատարող՝ Զարուհի Ղազարյան