Կենտրոնական բանկ

Հայաստանի Հանրապետության տարածքում գործող բանկերին 
վարկային կազմակերպություններին 
ապահովագրական ընկերություններին 
ապահովագրական բրոքերներին 
ներդրումային ընկերություններին 
ներդրումային ֆոնդի կառավարիչներին 
գրավատներին 
արտարժույթի առուվաճառք իրականացնող կազմակերպություններին 
վճարահաշվարկային կազմակերպություններին 
«ԱՔՌԱ Քրեդիթ Ռեփորթինգ» ՓԲԸ-ին 
«Հայաստանի կենտրոնական դեպոզիտարիա» ԲԲԸ-ին 
«Հայաստանի ֆոնդային բորսա» ԲԲԸ-ին 

Հարգելի՛ գործընկերներ,

25.06.2019թ. ընդունվել է ««Պետական տուրքի մասին» օրենքում փոփոխություններ և լրացումներ կատարելու մասին» ՀՀ օրենքը (Այսուհետ՝ Օրենք): Օրենքի համաձայն 2020թ. հունվարի 1-ից փոփոխվելու են գործունեության որոշակի տեսակներով (այդ թվում՝ ֆինանսական գործունեության տարբեր տեսակներով) զբաղվելու համար սահմանված տարեկան պետական տուրքերի դրույքաչափերը, ինչպես նաև սահմանվել են նոր տուրքեր:

Մասնավորապես,

• 01.01.2020 թվականից հետո գրանցվող կամ լիցենզավորվող ֆինանսական կազմակերպությունները և վերջիններիս մասնաճյուղերը գործունեություն իրականացնելու համար պետք վճարեն տարեկան պետական տուրք՝ նոր դրույքաչափերով:
• Մինչև 01.01.2020 թվականը գրանցված կամ լիցենզավորված և գործող կազմակերպությունների համար տարեկան պետական տուրքերի նոր դրույքաչափերը գործում են յուրաքանչյուր սուբյեկտի գրանցման և/կամ լիցենզավորման ամսաթվին համապատասխան հերթական տարին սկսելու ամսաթվից:
• Ֆինանսական կազմակերպությունների մասնաճյուղերի համար, որոնք նախկինում տուրք չէին վճարում, սահմանվել են տարեկան պետական տուրքեր: Ընդ որում՝ 01.01.2020թ. դրությամբ գործող մասնաճյուղերի համար տարեկան պետական տուրք վճարելու պարտավորությունն առաջանում է յուրաքանչյուր մասնաճյուղի գրանցման ամսաթվին համապատասխան հերթական տարին սկսելու ամսաթվից:
• Վարկային կազմակերպությունների մասնաճյուղերի համար սահմանվել է տարբերակված մոտեցում, կախված արտարժույթի կանխիկ փոխանակում իրականացնելու հանգամանքից:
• Ապահովագրական ընկերությունների մասնաճյուղերի համար սահմանվել է տուրք՝ անկախ ապահովագրական դասերի քանակից:
• ՀՀ ԿԲ կողմից լիցենզավորվող կազմակերպությունների համար վերացվել է այլ վայրում ևս միևնույն գործունեություն իրականացնելու դեպքում, տարեկան տուրքի 50%-ը վճարելու հնարավորությունը:

Միևնույն ժամանակ հարկ ենք համարում հիշեցնել, որ տարեկան պետական տուրքերը ժամանակին չվճարելու դեպքում հաշվարկվում է տույժ, որը ենթակա է գանձման օրենքով սահմանված կարգով:

Հաշվի առնելով վերը նշվածը, ձեր ուշադրությունն ենք հրավիրում վերը նշված փոփոխություններին, «Պետական տուրքի մասին» ՀՀ օրենքով սահմանված պարտավորությունները ժամանակին և սահմանված չափով կատարելու համար:

Լիցենզավորման և կորպորատիվ ֆինանսների վարչության պետ ՝   Էդգար Սարգսյան

Սույն գրության վերաբերյալ լրացուցիչ պարզաբանումներ ստանալու համար կարող եք դիմել ՀՀ կենտրոնական բանկի Լիցենզավորման և կորպորատիվ ֆինանսների վարչության լիցենզավորման ու գրանցման բաժինների աշխատակիցներին