Արտակ Մանուկյան
Խորհրդի անդամ
Արտակ Մանուկյանը 2021 թվականի հոկտեմբերի 28-ին նշանակվել է Կենտրոնական բանկի Խորհրդի անդամ՝ վեցամյա ժամկետով: Որպես խորհրդի անդամ՝ նա նաև Աուդիտի կոմիտեի անդամ է:
Մինչ Կենտրոնական բանկին միանալը, նա եղել է ՀՀ Ազգային ժողովի պատգամավոր և հանդիսացել է Ֆինանսավարկային և բյուջետային հարցերի մշտական հանձնաժողովի նախագահի տեղակալ։ Նա նաև եղել է ՀՀ վարչապետի խորհրդական։ Իր մասնագիտական կարիերան սկսելով որպես տնտեսագետ մասնավոր հատվածում՝ նա հետագայում ղեկավարել է «Հայկական պղնձի ծրագիր» ՓԲԸ-ի պլանավորման և վերլուծության բաժինը։ Իր մասնագիտական գործունեության ընթացքում պարոն Մանուկյանը հանդես է եկել որպես մի շարք միջազգային կազմակերպությունների հայաստանյան գրասենյակների փորձագետ (TI, WB, ADB, UN, GIZ, World Vision)։ Նա նաև իրականացրել է հետազոտություններ համաշխարհային տարբեր հաստատություններում, այդ թվում՝ ԱՄՆ-ի Ֆեդերալ Ռեզերվի Բանկում (Կլիվլենդ, ԱՄՆ), Պոստդամի համալսարանում (Գերմանիա), Դելավերայի համալսարանում (ԱՄՆ) և ՀՀ կառավարության Կառավարման և տնտեսական բարեփոխումների ինստիտուտում:
2017-2020 թվականներին Արտակ Մանուկյանը եղել է «Հանրային քաղաքականության հետազոտությունների ազգային կենտրոն» ՀԿ նախագահ։ Նա եղել է ՓՄՁ համագործակցության ասոցիացիայի և Կոռուպցիայի դեմ պայքարի դաշինքի նախագահ։ Նա նաև հանդես է գալիս որպես ԵՄ «Կառուցողական երկխոսության հանձնառություն» ծրագրի փորձագետ:
Արտակ Մանուկյանը ծնվել է Երևանում։ Նա ուսանել է Համաշխարհային տնտեսագիտություն՝ ավարտելով Երևանի պետական տնտեսագիտական համալսարանը։ Շարունակել է հետբուհական կրթությունը ՀՀ կառավարության Կառավարման և տնտեսական բարեփոխումների ինստիտուտում՝ ստանալով տնտեսագիտության թեկնածուի գիտական աստիճան և հետագայում դարձել է դոցենտ։ Մանուկյանն իր կրթությունը շարունակել է Շվեյցարիայի միջազգային հետազոտությունների ինստիտուտի Դիվանագիտության դպրոցում և Եվրոպայի խորհրդի Երևանի քաղաքական հետազոտությունների դպրոցում։
Արտակ Մանուկյանը ավելի քան 40 գիտական հրապարակումների և երկու մենագրությունների հեղինակ է: