Գնաճի նպատակադրման ռազմավարության ներքո էապես
կարևորվում է ԿԲ հաղորդակցումը հանրության հետ, որի հիմնական ուղիներից մեկը
յուրաքանչյուր եռամսյակ «Գնաճի հաշվետվության» հրապարակումն է:
«Գնաճի հաշվետվության» առաջին բաժինը
ներկայացնում է «Դրամավարկային քաղաքականության ծրագիրը», որը ներառում է
կանխատեսվող հորիզոնում դրամավարկային քաղաքականության ուղղությունները և դրանց
ներքո գնաճի ու մակրոտնտեսական մյուս ցուցանիշների կանխատեսումները: Վերոնշյալ
կանխատեսումները հիմնված են ներկա իրավիճակի գնահատականների և ապագայի
վերաբերյալ ԿԲ ենթադրությունների վրա, որոնք ներառում են նաև ԿԲ
գործողությունների ազդեցությունը:
Հաշվետվության երկրորդ բաժինը նախորդ եռամսյակում
գնաճի նպատակի իրագործմանն ուղղված «Դրամավարկային քաղաքականության ծրագրի
կատարման հաշվետվությունն» է, որը ներկայացնում է իրականացված դրամավարկային
քաղաքականության արդյունքները և տնտեսության փաստացի զարգացումները:
Գնաճի նպատակային ցուցանիշին զուգահեռ գնաճի
կանխատեսման և դրա հիմքում ընկած ենթադրությունների հրապարակումը ՀՀ
կենտրոնական բանկի դրամավարկային քաղաքականությունը դարձնում է առավել
թափանցիկ, հասկանալի և կանխատեսելի, որով նպատակադրվում է բարձրացնել
Կենտրոնական բանկի հանդեպ հանրության վստահությունը: ՀՀ կենտրոնական բանկը
համոզված է, որ հանրության կողմից հասկանալի ու վստահելի դրամավարկային
քաղաքականությունը արդյունավետ ներգործություն ունի գնաճային սպասումների
խարսխման և գների կայունության ապահովման ծախսերի նվազեցման առումով:
Դրամավարկային կանոնի համաձայն՝
քաղաքականությունն ուղղվում է նպատակային 4% ցուցանիշի և գնաճի կանխատեսումների
միջև շեղումները նվազագույնի հասցնելուն: Ծրագրված քաղաքականության
ուղղությունների շրջանակում ձևավորվող գնաճի ցուցանիշի հետագիծն էլ
հրապարակվում է հավանականությունների բաշխման գծապատկերի միջոցով՝ 12
եռամսյակների ժամանակային հորիզոնի համար:
|