Ֆինանսական կայունության ապահովման խնդիրը առավելապես կարևորվել է 2007-2008թթ. համաշխարհային ֆինանսատնտեսական ճգնաժամից հետո, երբ պարզ դարձավ, որ առանձին ֆինանսական կազմակերպությունների կարգավորմանն ուղղված քաղաքականությունը դեռևս լիարժեք և բավարար չէ ամբողջ ֆինանսական համակարգի կայունության ապահովման համար: Միևնույն ժամանակ, առանց ֆինանսական համակարգի կայունության հնարավոր չէ ապահովել կայուն մակրոտնտեսական միջավայր։
Ֆինանսական կայունության ապահովման կարևորությունը հաշվի առնելով՝ մի շարք երկրներում ֆինանսական կայունության ապահովումը օրենսդրորեն ամրագրվել է որպես կենտրոնական բանկերի առաջնային նպատակներից մեկը:
Կենտրոնական Բանկի բնորոշմամբ ֆինանսական կայունությունը ֆինանսական համակարգի՝ ֆինանսական հաստատությունների, շուկաների և շուկայի ենթակառուցվածքների կողմից հավանական ցնցումներին ու անհավասարակշռություններին դիմակայելու ունակությունն է՝ այդ կերպ նվազեցնելով ֆինանսական միջնորդության գործառույթների խաթարման հավանականությունը:
Ֆինանսական կայունության նպատակը ոչ թե մեկ առանձին ֆինանսական հաստատության կայունությունն է, այլ ամբողջ ֆինանսական համակարգի կայունությունը:
Ֆինանսական կայունության ապահովման նպատակով Հայաստանի Հանրապետության կենտրոնական բանկը իրականացնում է մակրոպրուդենցիալ քաղաքականություն: Կենտրոնական բանկը շարունակաբար մշտադիտարկման է ենթարկում ֆինանսական համակարգում ռիսկերի կուտակումը (կամ նյութականացումը) նախանշող վաղ ահազանգման տարատեսակ ցուցանիշները, դրանց համախմբման արդյունքում կառուցված ինդեքսները, ինչպես նաև կիրառում է ռիսկերի գնահատման տարբեր մոդելներ և մակրո սթրես թեստավորման համակարգեր: Իրականացված վերլուծությունները, ինչպես նաև դրանց արդյունքում կատարված եզրահանգումները/առաջարկությունները ներկայացվում և քննարկվում են <<Կենտրոնական բանկի ֆինանսական կայունության և հատուկ կարգավորման հանձնաժողովի>> նիստերին: Վերջնական որոշումները կապված մակրոպրուդենցիալ քաղաքականության գործիքների կիրառման հետ կայացնում է Հայաստանի Հանրապետության կենտրոնական բանկի խորհուրդը:
Կենտրոնական բանկի ֆինանսական կայունության եւ հատուկ կարգավորման հանձնաժողով
Ֆինանսական կայունության և հատուկ կարգավորման հանձնաժողովը Կենտրոնական բանկի նախագահին կից խորհրդակցական մարմին է, որն իրականացնում է ֆինանսական համակարգի կայունության գնահատում, դրա ապահովմանն ուղղված միջոցառումների քննարկում, նախապատրաստում, իրականացման ուղղությունների և պայմանների վերաբերյալ առաջարկությունների ներկայացում, այլ գործողություններ: Անհրաժեշտության դեպքում այն կարող է իրականացնել իրավիճակի բազմակողմանի վերլուծություն:
Հանձնաժողովի նիստերին, անհրաժեշտության դեպքում, կարող են հրավիրվել նաև հանձնաժողովի անդամներից բացի այլ ներկայացուցիչներ: Որոշակի հարցեր քննարկելիս, հանձնաժողովի նիստերին կարող են հրավիրվել Հայաստանի Հանրապետության ֆինանսների նախարարության, Ավանդների հատուցումը երաշխավորող հիմնադրամի, ինչպես նաև այլ պետական գերատեսչությունների համապատասխան ներկայացուցիչներ: