Պատմության թանգարանում բացվել է «Հայաստանի Հանրապետության կենտրոնական բանկի հուշադրամները» ժամանակավոր ցուցահանդեսը, որը կգործի մինչև նոյեմբերի վերջ:
Ցուցադրությունը նվիրված է Հայաստանի Հանրապետության 20-ամյակին: Այս 20 տարիների ընթացքում ՀՀ Կենտրոնական բանկը թողարկել է շուրջ 150 հուշադրամ: Ցուցադրությանը ներկայացված են մոտ 4 տասնյակ ոսկե և շուրջ 100 արծաթե հուշադրամներ:
Առանձին տեղ են գրավում Հայաստանի պետականությանը նվիրված մի շարք հուշադրամներ, որոնք ներկայացնում են Հայոց չորս թագավորությունները, ինչպես նաև Հայաստանի Հանրապետության 10, 15, և 20-ամյակներին նվիրված հուշադրամները:
Առանձին շարքերով ներկայացված են անվանի անհատներին, Հայաստանի և միջազգային հանրության համագործակցությանը, ճարտարապետական հուշարձաններին, Հայաստանի մշակույթին, պատմությանը, Հայաստանի բուսական ու կենդանական աշխարհին, ինչպես նաև տարբեր սպորտային իրադարձություններին նվիրված հուշադրամներ:
ՀՀ կենտրոնական բանկը մասնակցում է նաև մի շարք միջազգային դրամագիտական ծրագրերի, ինչպիսիք են ԱՇԽԱՐՀԻ ՆԿԱՐԻՉՆԵՐԸ, ՖՈՒՏԲՈԼԻ ԱՐՔԱՆԵՐԸ, ԾԱՂԻԿՆԵՐԻ ԳԵՂԵՑԿՈՒԹՅՈՒՆԸ, ԿՈՎԿԱՍԻ ԿԵՆԴԱՆԱԿԱՆ ԱՇԽԱՐՀԸ և ԿԵՆԴԱՆԱԿԵՐՊԻ ՆՇԱՆՆԵՐԸ, որոնց շրջանակներում թողարկվել են մոտ 50 հուշադրամներ:
ԿԲ հասարակայնության հետ կապերի ծառայություն
հեռ/ֆաքս. 56 37 61
էլ-փոստ. mcba@cba.am
www.cba.am