Սույն թվականի հոկտեմբերի 24-ից 25-ը Երևանի «Արմենիա Մարիոթ» հյուրանոցում տեղի է ունեցել «Թվային ակտիվների՝ փողերի լվացման և ահաբեկչության ֆինանսավորման դեմ պայքարի շրջանակներում ռիսկահենք կարգավորում և վերահսկողություն» թեմայով աշխատաժողով։
Աշխատաժողովի նպատակն էր Հայաստանի Հանրապետության կենտրոնական բանկի, այդ թվում՝ ֆինանսական դիտարկումների կենտրոնի ներկայացուցիչներին ներկայացնել թվային ակտիվների և թվային ակտիվների ծառայություններ մատուցողների ոլորտում ՓԼ/ԱՖ դեմ պայքարի տեսանկյունից ռիսկահենք կարգավորման և վերահսկողության միջազգային լավագույն փորձը, ինչպես նաև թվային ակտիվների հետ կապված ռիսկերն ու խոցելիություններն, արդյունավետ վերահսկողության իրականացման լավագույն փորձը և այլն։
Աշխատաժողովն իրականացվել է «Հայաստանում կոռուպցիայի դեմ պայքարի և կանխարգելման ինստիտուցիոնալ կարողությունների հզորացում» ծրագրի շրջանակում, որը ֆինանսավորվում է Եվրոպական միության և Եվրոպայի խորհրդի կողմից և իրականացվում է Եվրոպայի խորհրդի՝ Գործընկերություն հանուն լավ կառավարման (ԳԼԿ 2) ծրագրային ձևաչափի երկրորդ փուլի շրջանակում։